¡No por quibra nos wes'i lomba!

Nós no ta bai bisa «nós di» y nós no ta bai bisa «¡bo ta weta!». Loque ta pasando na e momentu aquí cu e grúponan di tambú y aguinaldo tábata di spera. Den un artículo titulá Educashón clásico y papiamentu nos a referí na e preshón cu lo bai aumentá pa trata di eliminá nos expreshonan cultural. Nós ta cita nós mes:

Y cu un capítulo mas den historia colonisadó na caminda, o sea mas di e mesún receta for di día qu nós tá colonia, y e mero echo qu abiertamente y sin ningún clase di escrúpulo ta bai tin còntròl directo riba nos mes presupuesto, nós mester queda pendiente di còrtamentu den presupuesto pa p.e. educashón na papiamentu, desarollo di papiamentu como idioma mama y hasta expreshón cultural popular (p.e. Kas di Kultura). ¿Quico bóso ta pensa di un variante di Sticusa pa supuestamente llega na intercambio cultural? E idea di Bos pa pone un sucursal di Rijksmuseum na Còrçao tá un adelanto riba loque ta bai bin.

At’é riba nos tayó. ¿Unda nos lidernan a queda awor? ¿Den sector privá y den gobièrnu? ¿Unda sindicalismo a queda? ¿Unda nós mes a queda awor?

Nós no ta pretendé di haci brua, ni mira futuro. Nós análisis no tá nada mas qu noshón y conocementu di historia qu ta siña nós qu esaqui tá pasando algún siglo caba y lo sigui pasa.

Precisamente awor qu a haci enter un transformashón den nos sistema di educashón y a introducí papiamentu, tantu na scol como tambe idioma oficial, nós tá pará ante un fase nobo di intento di recolonisashón. No tá nos invento. Scucha Gibi Cijntje di Sentro di Doktor qu, sin quita sin pone, a llega di bisa qu e fase aquí tá un fase nobo di recolonisashón y qu esey tá notábel caba na nos universidad.

¿Y cu un aumento di e cantidad di hulandés qu lo queda aqui pa algún aña, quico nós ta bai haci cu nos sistema di educashón? No lubidá qu tin solamente 4 scol na hulandés. ¿Nán lo sigui un curso di aclimatashón, siña papiamentu, o lo exigí mas cupo na nos scolnan y finalmente exigí hulandés atrobe na scol?

¿Quen a para quetu na e choque den parlamento tocante formulá un documento na hulandés?

Esaqui tá un capítulo mas den historia colonisadó. ¿Y quico tábata su resultado? Un cultura bibu, un papiamentu bibu, reconocementu di loque ta di nós. Tur esaqui a pesar di tantu aña di opreshón. Por lo tanto nós por concluí qu e colonisadó no tá logrando su meta. Al contrario. Por lo tanto nós no tin miedu pasobra nós a demostrá den transcurso di historia qu nós n’ ta entregá loque tá di nós.

¿Quico e ta nificá antó? Qu nós mester tá alerta y combativo y lucha pa loque nós tá.

Tá tantu aña caba qu ta purba quibra nos wes’i lomba sin por logra.

Papiamentu Bibu