Atrobe un periodo sin scirbi

Atrobe un periodo sin scirbi. E biá aquí tábata debí na falta di comodidad pa por scirbi. E asuntu aquí tá prácticamente solushoná. Nós lo trata di drenta den un fase acelerá di publicashón pasobra tin diferente asuntu qu ta requerí atenshón urgente. Nós ta menshoná algún aqui.

1. Fraude den mundu di construcshón na Macambalandia a sigui normal, a pesar di investigashón parlamentario na 2002. Ningún hende a bai cerá. Corecshón: David Dick, un curasoleño, a bai cerá. Un di e companíanan qu a hunga un papel importante den e grandísimo caso di fraude macamba aquí tábata Koop Tjuchem, awendía transformá den MNO Vervat, tambe quetu bai operashonal na Còrçáo. Pues recientemente a bolbe sali caso di fraude den mundu di construcshón na Paisnan Abóu.


2. Referéndum. Referéndum tá fundamentalmente un asuntu di yu di tera. Ningún strañero por participá y dicidí pa nós. Strañero tá loque e tá: un huésped, bon biní, cu tur honor y rèspèt, den nos cas tanten e comport’é, pero sin embargo un huésped. Además, den e caso específico di macamba, lo siguiente: macamba, o hulandés, ta representá e ocupadó y colonisadó. Y ningún caminda na mundu bó ta mira qu e colonisadó y ocupadó, representá pa su ciudadánonan residenciando na e país ocupá, ta y por participá den actividad electoral y menos un referéndum. Pa por conservá nan posishón privilegiá den un sociedad colonial feudal, tá mas qu obvio pa cuá opshón macamba lo scohe: e opshón qu lo mantené, consolidá y profundisá nan dominio colonial racista. Israelí no por vota na teritorio palestino ocupá. Mericano, inglés o macamba no por participá na teritorio afgano o iraquí ocupá. Por lo tanto, permití strañero en general y macamba en particular, vota tá manipulashón di e resultado di referéndum. Por lo tanto esaqui tá fraude electoral. Te caminda nós a scucha y lesa, nos no a tende Oposishón bisa algu den e direcshón aquí.


3. E problema qu a surgi entre macamba y rubiano relashoná cu e infórmenan qu regularmente Representashón di Paisnan Abóu ta manda pa gobièrnu macamba. Directamente cu esaqui tá relashoná e «liaison» macamba na Aruba qu supuestamente méster vigilá Venezuela. Pa cuminsá mester remarcá qu e «liaison» aquí a queda nombrá pa reichscommissar Henk Kamp, qu na momento di su nombramentu tábata miníster di defensa (den idioma corecto: minister di guera). Por lo tanto tá birando cla paquico e gobièrnu macamba aquí ta nombra reichscommissar Kamp, un peso pisá di un partido di oposishón (VVD). Reichscommissar tá e punto central qu mester guía e consolidashón y profundisashón di dominio colonial di Antilla, y en particular anecshón di BES.


4. Publicashón di Declarashón Universal di Deréchonan Humano. Nos tá traduciendo e documento importante aquí pa laga nos compatriótanan mira qu na fundamento di e declarashón tá e derecho qu tá matrís di tur derecho: derecho natural.


Papiamentu Bibu