Base Militar Strañero

Imperio mericano, di cua macamba ta forma un parti integral, quièr sigui expandé militarmente. Aparte di cientos di base militar ya na mundu bou di mando di diferente centro di operashón militar manera Southcom, Northcom, Africom etc., awor e compleho germano quièr cuminsá operá cuáter base militar na Colombia. Tá parce un contradicshón qu un imperio, awor qu su stabilidad social, económico y financiero tá más débil qu nunca, qu su estado financiero ta unu di bancarota, ta sigui expandé militarmente. Loque ta parce un contradicshón a primera bista, tá consecuencia lógico di naturalesa di un imperio. Un imperio qu ta tambaleando, nò, qu ta den su proceso di decaimentu (algu qu por dura algún década te algún siglo), sémper ta purba reafirmá y/o reconquistá teritorio pa sigui dominá y explotá.

Nós, Antilla, qu parce un granito den e gran huega di ahedrés aquí, tin un posishón importante pa loque ta trata nos posishón for di cua e compleho militar-económico-financiero ta operá pa controlá, dominá y explotá patria caribo-latinoamericano. Macamba ta forma un eslabón di importancia, pasobra macamba ta haci loque su doño ta manda bisé, mientras tantu su interesnan ta queda salbaguardiá.

Den e contexto aquí e diferente guéranan qu mundu noroccidental germano, entretanto alemán a bira un miembro activo, ta hiba na mundu ta toca nós tambe. E guéranan di ocupashón genocida contra nos rumanan iraquí, afgano, paquistaní, iraní – y den pasado vietnamés, coreano etc. etc.. - tá tambe nos guera. Tá e mesún guera qu ya algún siglo germánonan ta hiba contra nós. Tin dos opshón: o sucumbí como catibu o resistí.

Obama den su campaña político pa presidencia di Merca tábata cla. Merca mester reafirmá y reconquistá su posishón di liderazgo y influencia na América Latino. Eufemismo pa dominio y explotashón. Definitivamente Merca a pèrdè influencia y dominio na América Latino. Tin diferente momento y desarollo qu tá indicativo. Derota di e plan neoliberal TLC (Tratado di Liber Comercio). Creashón di Mercosur cu un posíbel expanshón incorporando Venezuela. Creashón di Unasur, un modelo di integrashón y cooperashón, inclusive di seguridad. Creashón di Alba (Alianza Bolivariana para los Pueblos de nuestro América) sin participashón yanqui (o sea tambe macamba). Creashón di modélonan di cooperashón y solidaridad manera Petrocaribe. Decishonan manera derogamentu di e resolushón di 1962 qu a expulsa Cuba durante último asamblea general di O.E.A. na San Pedro Sula na Honduras. Ya mundu latinoamericano no ta balia na nan amèn.

Imperio tá e mesún imperio. ¿Quico a cambia? En bes di su tradishonal cara germano, Imperio a haña un capa di vèrnis pretu pa confundí sobrá di mundu. Obama lo no retirá trópanan mericano manera el a primintí. Obama a intensificá e guera na Afganistán y a ampli’é te den Paquistán. Obama a autorisá e gòlpi di estado na Honduras. Obama a cumpli cu su obligashón como comandante en hefe di baña su manan den nos sánguer pa proba qu e ta haci loque a mand’é haci. Obama, manera ya nós a scirbi, tá ideológicamente contaminá. Obama tá, pa papia cu Franz Fanon, di cueru pretu, másquer blancu.

Den e contexto histórico aquí lo crea e básenan militar yanqui na Colombia. Nán, manera e básenan militar strañero yanqui y macamba na Antilla, t’éy pa inherencia colonial, invashón colonial y dominashón colonial y explotashón colonial. Cu e métanan aquí Imperio a resucitá su Cuarta Flota Imperial. No pa changa porco, ni pishiporco.

Tin un otro motibu di gran importancia pa cua ta crea e básenan aquí. Tin dos manera mas di controlá y dominá un nashón soberano y independiente, aparte di gòlpi di estado, magnicidio, invashón, revolushonan di coló guiá pa organisashón no-gubernamental. Unu tá económico y financiero a través di mecanísmonan manera Fondo Monetario Internashonal y Banco Mundial. E manera aquí ta funshoná especialmente cu paisnan póber y/o débil. Antilla tambe tá testigu di e manera aquí. Un país ricu na fuéntenan natural difícilmente por queda chantaheá.

E otro manera probá, desintegrashón di Unión Soviético tá ehemplo, tá impulsá un careda armamentista. O sea, crea un realidad y un sentido di menasa y obligá Venezuela invertí demasiado capital den defensa y armamento, capital qu por a invertí mihó den combatimentu di pobresa, desarrollo humano, salubridad, educashón etc. etc., creando di tal manera problémanan social y asina debilitá sociedad venezolano di padén.

Papiamentu Bibu