Colonia o Colonia Plus

Diamars tábatin un debate entre SI y NO na Iglesia Grasia Abundante. Un debate qu lamentablemente nós no tábata na altura di je. Raturatu nós sa bishitá nos amígunan cristián na e iglesia vibrante aquí cu su gran pastor den tur sentido di palabra.

Tambe nós a comprondé qu a pesar di e debate, aínda tin basta hende confundí qu no sa quico nán méster haci.

Nós ta quere qu en parte e confushón tá debí na e posibilidad qu en realidad e diferencia entre SI y NO no tá grandi. Es decir qu tur dos opshón no ta mishi cu nos condishón colonial.

Algu di historia pa pone Declarashón Final den perspectiva histórico-geopolítico.

Na dado momento alrededor di 500 aña pasá algún país europeo ta dicidí di explorá mundu. E «aventura» aquí ta resultá finalmente den ocupashón y explotashón di nos patria: América Latino y Caribe. E poténcianan colonial original, Spaña y Portugal, lentamente méster cede tereno hegemónico na otro paisnan europeo, entre nán Inglatera, Paisnan Abóu, Francia.

Den historia colonial, siglo dieshete tá conocí como e época di dominio hegemónico macamba. Marx a llama Paisnan Abóu é modelo capitalista pa excelencia di siglo dieshete. Un expanshón colonial qu a resultá directamente for di nan liberashón di dominashón di Spaña. Réstonan fósil di dominashón spañó aínda nós ta topa den nan himno. E posishón aquí lentamente macamba tin qu cede na Inglatera qu na su apogeo tábata dominá un gran parti di mundu. Na comienso di Siglo pasá pocopoco imperio inglés tin qu cede su posishón na Merca.

Notábel tá dominio hegemónico germano a partir di e época di oro di siglo 17. For di e momento ey gran parti di mundu tá queda someté económicamente y militarmente pa e grupo étnico aquí.

Nan riquesa a aumentá considerablemente pa nan ocupashón di teritorio aheno, hòrtá, ocupá y explotá y pa uzo di catibu. E aumento considerábel aquí Karl Marx a llama Acumulashón Originario (di capital). E acumulashón aquí tábata masivo pa principalmente dos motibu: ocupashón ilegal di áreanan di teritorio vasto pa vía di hòrtamentu qu no a costa cèn. E teritórionan vasto aquí nán a desarollá haciendo uzo di un forsa laboral gratis den forma di catibu qu tampoco tábatin e gástunan qu p.e. awendía calque compañía tin na gastu salarial, prima social etc. etc.

Nós a llama e céntronan di actividad económico aquí campo di concentrashón, en bes di su eufemismo plantashi. Por lo tanto no tábata trata di un economía di plantashi, sino di economía di campo di concentrashón. Di tal manera nós a llama e bárcunan qu a uza pa transportá catibu, campo di concentrashón marítimo.

Nós ta haci un salto. Na caminda pa final di di dos guera mundial, diferente potencia colonial méster a cuminsá decolonisá, es decir reconocé soberanía y independencia di e teritórionan vasto qu nán tábata ocupá y explotá ilegalmente. Un di e motíbunan principal qu a hiba na decolonisashón tábata hustamente e contraforsa riba e tarima geopolítico mundial qu Unión Soviético a cuminsá ehercé. Durante algún decena geopolíticamente mundu tábata den un supuesto balansa, loque tá conocí como guera friu. Un supuesto balansa pasobra riba e tarima geopolítico mundial tábatin guera: Corea, Vietnam, Afganistán y diferente otro conflicto di carácter aparentemente local. Un parti di e batalla ideológico tábatin como consecuencia asesinato di diferente líder revolucionario y progresivo o gòlpi di estado manera Salvador Allende (gòlpi di estado y asesinato), Ernesto Guevara (asesinato), Jorge Eliécer Gaitán (asesinato), Luis Carlos Galán Sarmiento (asesinato), Jacobo Guzmán Arbenz (gòlpi di estado) y Hugo Rafael Chávez Frías (gòlpi di estado).

Añanan cuarenta di siglo pasá. E reina macamba Juliana, bon wardá den exterior for di e bochincha y matanza di di dos guera mundial, ta pronunciá un discurso qu ta «boga» pa cámbionan estatal dénter di e supuesto reino macamba. Supuestamente lo a bini un orden estatal diferente y igualitario. Den un momento di vacuo di poder, algún rebelde indonés ta declará independencia y soberanía unilateralmente di Indonesia. Algu qu obviamente macamba no a aceptá. Resultado: guera colonial di opreshón contra pueblo indonés. Den e lucha ey Indonesia tá sali victorioso, no sin antes sufri dos guera colonial qu e mente macamba maligno eufemísticamente te qu e día di awe aínda ta llama «acshón policial». Dos guera colonial bou di responsabilidad di e colonial y PvdA-ista Drees, supuestamente di izquierda y progresivo. Nos representántenan den nan inocencia y ignorancia ta cooperá y colaborá qu macamba pa asina yuda nán scapa di queda marcá como potencia poseedor di colonia. E resultado: e maldito Statüt, e codificashón hurídico di nos condishón colonial racista. Asina macamba ta logra scapa na bista di mundu loque realmente nán tá. Macamba ta haci loque sea pa conservá e supuesto bon nòmber qu nán tin. Loque ta producí macamba dividéndonan enorme na escala mundial tá precisamente e supuesto bon nòmber ey: un pueblo inocente, pacífico, un poco particular qu ta cultivá tulipán y bisti zapatu di palu, ma en todo caso pacífico y confiábel.

Durante e último 55 áñanan nós a biba cu e mentira qu nós ta autónomo y qu nós mes por dicidí pa nós mes, sin realisá nós qu nada no a cambia na nós condishón colonial. Simplemente a dun’é un capa di vèrnis pa tapa su realidad colonial racista y duna nos héndenan e ilushón di autogobernashón.

Tábatin un momento den nos historia qu a duna nós e oportunidad di reclamá nos libertad y asina reclamá nos soberanía y independencia secuestrá pa macamba. E momento ey tábata Trinta di Mei. Mundu revolucionario curasoleño tábata prácticamente cla pa e momento supremo ey. Lamentablemente nos vanguardia no tábatin e curashi di bati brecha den e bastión colonial racista macamba y quibra e dam colonial racista qu tábata tene nos libertad secuestrá y asina abri caminda pa libertad.

E siguiente salto qu nós ta haci tá derumbe di bloque soviético y Pacto di Varsovia. For di e momento ey mundu occidental, y particularmente mundu noroccidental, o sea mundu germano, mericano-inglés-macamba a cuminsá e proceso de reconquista, ocupashón y dominio di teritorio pèrdí. Y no solamente di teritorio pèrdí, sino tambe di còntròl di teritorio qu anteriormente no tábata cai directamente bou di nan influencia hegemónico. Nós ta referí en particular na Rusia y posteriormente China.

E cámbionan geopolítico qu derumbe di bloque soviético y Pacto di Varsovia a abri caminda pa e dos guéranan di Golfo Pérsico contra Iraq y e guera colonial di ocupashón na Afganistán.

Den cuadro di dominio germano, di dos guera mundial no tábata nada mas qu un pleitu entre rumán germano pa hegemonía. Hitler tábata un creashón germano, cultivá y financiá pa su mes rumanan germano (inglés, mericano y macamba): Hitler den su ignorancia y su estupidés delirante a bira e sacrificio militar contra Rusia, un símpel títere mientras e titiritéronan germano tábata manipul’é den fondo.

Anteriormente e bloque eslavo, representá principalmente pa Rusia, a scapa na wowo di angua di dominio y posiblemente eliminashón. Ya na 1918-1919 mundu germano ta organisá un expedishón militar contra Rusia revolucionario. Di dos guera mundial tá e siguiente ataque germano pa debilitá y dominá Rusia y Eurasia. Ma nós no ta referí na e dos inténtonan aquí. Loque nós ta referí n’e ora nós ta bisa qu nán a scapa na wowo di angua tá, qu mundu germano tábatin intenshón, después qu a regla cuenta cu japonés na Nagasaki y Hiroshima, di uza bòm atómico o en todo caso uzé como instrumento di chantahe y extorshón pa haña Rusia na rudilla. Afortunadamente Rusia, na tempu a logra di desarollá nan mes arma nuclear pa frena e germánonan.

E siguiente ataque. Méster a subyugá Rusia y tambe China pa por a sigui cu nan dominio mundial, loque awendía llama Full Spectrum Dominance.

E ciegés aquí a pone germánonan dòl quere qu awor sí definitivamente mundu tá di nán: Destino Manifiesto mericano, Whiteman’s Burden mericano/inglés y Predestinashón Cavinista macamba den un tutu germano huntu, cla pa caba di dominá y explotá mundu na su antoho.

E locura patológico a pone idiótanan manera Francis Fukuyama declará e fase aquí di mundu como fin di historia: un mundu liberalisá, dominá pa libertad y mercado líber pa sémper.

Ata nós awor atrobe na comienso di historia cu un mundu totalmente destabilisá pa mercado y codicia líber, a rienda suelta.

Para un pinga mundu germano ta logra conquistá Rusia hegemónicamente y económicamente ora Gorbachov y particularmente Yeltsin a cuminsá pone Rusia na benta. Paralelamente mundu germano vía su instrumento y brasa militar OTAN, a cuminsá cera Rusia adén, treciendo e anterior repúblicanan soviético y miémbronan di e Pacto di Varsovia manera Polonia bou di nan influencia incorporando nán den OTAN. E plan bieu di dominá Eurasia y principalmente Rusia cu su enorme riquésanan natural tá e meta.

¿Y nós, America Latino y Caribe? Simon Bolivar tábata profetico y visionario cu e siguiente palabranan:

Los Estados Unidos parecen destinados por la Providencia para plagar la América de miseria a nombre de la libertad.

E Doctrina di Monroe (1823) ta reservá nós pa nan dominio imperial. O sea, America Latino y Caribe tá nan traspatio, nan curá patrás, caminda ningún otro potencia por bin mete. E «gran» germano Roosevelt e desarollá e concepto hegemónico aquí qu a bin llama Roosevelt su Corelario na e Doctrina di Monroe.

Asina germánonan a hiba guera tras di guera contra nós, asesinato, conflicto etc., etc. Un lista breve:

Guera Merca-Spaña na Cuba (1899)
Haití (1915 – 1934)
Haití (1957 – 1986)
Haití (2004)
Grenada (1983)
Panamá (1989)
Invashón na Playa Girón (Cuba) (1961)
República Dominicano (1965)

E invashón di República Dominicano na 1965 no solamente tábatin como meta destituí presidente Bosch. Su meta final tábata Invashón di Cuba.

Mientras bloque soviético y e grupo di paisnan no alineá tábata existí, continuamente macamba tábata «menasá» cu independencia, sabiendo qu e pueblo terorisá y atemorisá aquí no fácil y ligeramente lo a exihí su libertad.

Tantu tá nos temor qu algún compatriota bon confiá ta quere realmente qu lo llega un momento qu macamba lo fada y lo imponé nós independencia. ¿Quico nán ta bisa? Macamba no por obligá nós. Derecho internashonal y Nashonan Uní tá na nos banda. Riba e pensamentu eroneo aquí nós lo bolbe den e siguiente escrito.

Tres aña después di derumbe di bloque soviético y Pacto di Varsovia), na aña 1988 ta sali den e revista «científico-politico» di e partido macamba CDA, Christen Democratische Verkenningen, un artículo di ningún hende menos qu Hirsch Ballin. Si nos memoria no ta falla nós, tábata e edishón di luna di augustus di 1988.

Esencia di e artículo tá qu no tábata necesario mas «imponé» Antilla su independencia, sino restructuré. Sí, ya tá mas qu binti aña qu e Hirsch Ballin aquí tin nós pasenshi fregá.

Cu desaparishón di bloque soviético y Pacto di Varsovia, macamba atrobe a mira caminda líber pa reafirmá nan dominio colonial racista.

Hirsch Ballin su proposishón no tábata pa bondad y altruismo, sino e símpel echo qu no tábata necesario mas cede teritorio colonial ocupá.

Nós ta haci un salto y bai Declarashón Final. Nós a llega di scirbi ya diferente be, y nós reiterá atrobe nos ponencia:

Declarashón Final tá e siguiente fase di profundisashón y ampliashón di macamba su dominio colonial racista.

E tereno qu durante Statüt lentamente nán méster a cede por ehemplo riba tereno cultural y idiomático, awor tá atrobe blanco di nán atáquenan.

Cu lo anterior nós a trata di duna un buelo y bista helicóptero di un liña còrá den historia humano cu tá directamente vinculá cu nos historia.

Nos historia ta cai den e mesún liña còrá for di tempu qu un grupo di aristócrata latinoamericano liderá pa Simón Bolívar a dicidí qu ta basta. Ahán, pero e sed pa libertad, e deseo tan profundamente humano pa libertad, no a nace cu Bolívar, sino muchu mas promé qu tantu rebelión manera di Tula, Carpata, Boni, Baron y ótronan, desenbocando den e promé guera independentista bou di mando di e comandante haitiano Toussaint l’Ouverture.

E recuperashón (reconquista) y aumento aquí di teritorio y/o influencia hegemónico-militar germano tá precisamente e motibu di Declarashón Final.

Declarashón Final tá profundisashón y ampliashón di macamba su dominio colonial racista y recuperashón di tereno pèrdí cu e supuesto autonomía.

Si entre 1954 y awor, durante 55 aña, dominio colonial tábata tapá bou di e vèrnis qu llama Statüt, awor no tin ningún necesidad di bèrgüensa y hipocresía. Declarashón Final tá un Declarashon Final di Dominio Colonial Racista Abrí y Total contra nós.

Declarashón Final no tin nada di aber cu saneamentu di ningún debe. A uza saneamentu di debe pa por logra e premio colonial racista mayó: desbaratá Antilla fomentando desunión pa asina profundisá nan dominio colonial racista na promé lugá anexando BES, teritorio qu nos políticonan ignorante y sin vishón a regalá macamba, y na di dos lugá aumentando nan gara colonial racista na San Martin y Còrçáo.

Despues qu a balcanisá (debaratá) Antilla y logra gibraltarisá un parti (BES), o sea anexando BES y asina ocupé indefinidamente, e siguiente paso pa futuro lo tá tambe anexá sobrá di Antilla cu colaborashón local manera ta sosodiendo cu Booi y Boneiru.

¿Y con nán lo purba logra esey? Supuestamente, si acaso lo «sanea» un parti di e debe, ta laga un parti considerábel di e debe intacto, según cálculo entre 1.500 pa 2.000 millón florín qu lo tene nós na e palu di horca colonial racista cologá. Pasobra precisamente e 1.500 pa 2.000 millón florín ey lo queda cologá manera un spada di Damocles riba nos cabes y lo aumentá atrobe pa motibu di interés compuesto. Por lo tanto nós lo queda extremadamente vulnerábel pa chantahe y extorshón.

Concordancia di ley, manera formulá den Declarashón Final y enter e sistema hudicial controlá pa macamba, tá pa crea condishon faborábel pa macamba y actividad económico y financiero faborábel pa macamba.

Imponé derecho di contraé matrimonio pa paréhanan homosexual no tin nada di aber cu e tópico di igualdad y derecho humano, sino e intenshón de penetrashón cultural macamba na tur nivel, tambe ético y moral y asina purba di cambia sociedad antillano na nan modelo.

E supuesto garantía di democracia y deréchonan humano, no tin nada di aber cu democracia y deréchonan humano. Democracia y deréchonan humano a reemplasá supuesto mishón y religión como capa pa crimenan contra humanidad. ¿No tá asina? Ata e supuesto cristián Balkenende ta culpábel di participá na e guera na Iraq y Afganistán y e mas di 1.000.000 asesinato; un genocidio. Por lo tanto Balkenende tá un criminal di guera.

CFT (Comishón di Supervishón Financiero) como instrumento colonial directo di gobièrnu macamba, no a queda creá pa imponé un presupuesto balansá, sino pa pocopoco cuminsá còrta y influenciá den e áreanan qu tá promové nos emancipashón manera cultura, idioma, educashón na papiamentu.

CFT lo tá e instrumento colonial primordial pa logra e meta final di anexá Antilla completo.

Esaqui tá e maldito paquete qu nos políticonan ignorante a trece nós como regalo.

Tin un dicho na spañó qu ta bisa «no hay mal que dure cien años».

Ocupashón colonial racista macamba tá bayendo pa cuáter shen aña. Por lo tanto, ocupashón colonial racista tá basta ratu den tempu extraordinario.

¿Con un hende qu ta teme independencia, con hustamente un hende asina lo por duna un contesta riba e elecshón inevitábel pa su libertad?

Independencia ta bida mes. Esey ta nificá qu e bentáhanan y riésgonan (y no desbentaha) di independencia ta análogo na y comparábel cu e mesún bentáhanan y riésgonan qu un hende ta hañ’é confrontá cun’é den bida diario.

E pregunta antó si un hende quièr tá dependiente o independiente, e por contestá tumando na considerashón su propio bida.

Por lo tanto, si un persona na e momento aquí lo hañ’é confrontá ante e echo qu for di awor e no tin nada di bisa DEN SU MES CAS, y qu e no tin ni bos ni voto mas den tur loque ta regardá su propio cas, ¿quico tá su contesta?

Si e ta bai si acuerdo, anto e elecshón tá evidente. Si el a scohe pa otro bin manda den su mes cas, anto simultáneamente e méster busca un sicólogo pa su problémanan mental.

Esún qu no ta aceptá esey, un persona echo y derecho, méster tuma e pásonan correspondiente y decishón pa tá independiente y goberná su mes cas soberanamente.

Formulá di un manera mas cla: ¿Bó ta permití qu un otro hende ta bin dicidí riba loque tin qu pasa den bo mes cas? SI o NO.

Riba tur mentira colonial racista sémper tin un contesta cla.

Tá e tapaqueshi colonial macamba y e oló y neblina bou di e tapaqueshi ey qu ta limitá nos bista, ta nubla nos celéber y asina ta limitá nos capacidad di pensa y tá paralisá nos capacidad di actua.

Un NO tá un SI pa libertad. Un NO tá un SI pa independencia y soberanía.

Papiamentu Bibu