Ofensiva 2010: O nós ta triunfá o capitulá

Nós a cuminsá e batalla final. ¿Nós lo sali victorioso o nós lo capitulá? Oposishón, tantu Aliansa Patriotico como Lista Combiná méster cuminsá move. ¿Quico tá pasando?

Ya makamba y nan secuasnan, e gobernántenan colaborador colonial local, a cuminsá ofensiva. 48%/52%, e derota di mei pasá, tin nán bon lantá. 48%/52% a pesar di gran capital, manipulashón, intimidashón, chantahe, tá un derota.

E ofensiva di drecha algún bario tá inicio di e ofensiva. No tá nada otro qu un variante moderno di soborno manera antes tábata haci cu promésanan y regalamentu di cosnan manera frigidaire. Enter e ilushón di e supuesto sañeamentu di debe tá un acto coruptivo di soborno. E miserábel 1.6 millón pa combatí fuga di celéber (brain drain) qu Bibalargu y e makamba Pishifuerte a bin cun'é, na su turno un ofensa, tá otro acto di brua tera. ¿Quen di oposishón a reacshoná riba e insulto aquí? Tábatin, te caminda nós sa, un reacshón di prof. Carlos Weeber den corant.

Ya den un artículo anterior nós a duna un análisis di e figura De Jong-Elhage (E enigma qu llama De Jongh-Elhage). Un biaha mas tá presentando De Jongh-Elhage como mama di nashón. Y te aínda oposishón no a haña un contesta demoledor pa caba cu e imagen aquí. Si nós quièr triunfá den e elecshón di 2010, méster distruí e imagen aquí, qu atrobe nán tá cultivando. Méster haci un análisis di e fenómeno aquí a corto plaso pa formulá un táctica qu ta distruí e imagen, e aura qu tá cultivando rònd su persona.

Makamba na su turno tambe tá den un ofensiva. Mira por ehemplo Bijleveld qu mas y mas tá bisando qu pasado no tá importante, sino solamente presente y futuro. Riba e mentíranan aqui, Papiamentu Bibu a duna su contesta a través di 2 aña. Sin embargo nós lo antendé cun’é directamente, un biaha mas y tur biaha qu tá necesario. Mashá símpel. Bijleveld tá pasando pa e trápinan di e Sindrome Colonial Racista di Superioridad (mira: Perfil Sicológico di un Racista). Indignatio, Negatio y Inculpatio. E ta indigná qu nós ta «maha» muchu cu pasado, e ta ninga qu pasado tá importante, e ta ninga qu loque makamba ta haci tá colonial y finalmente e ta culpa nós di ta maha muchu cu algu qu según e no ta hiba nós ningún caminda.

Finalmente, pa bolbe riba e caso De Jongh-Elhage, méster atendé cu e asuntu aquí na tur nivel. No por hunga wega di hende nèchi. Méster lubidá tur considerashón di ética y baha na nivelnan maquiavélico pa caba cu e imagen aquí.

Un principio. E filósofo chinés Tzun-Zu a scirbi un tratado tocante guera. Un expreshón di je qu sémper nós tin na mente tá: «Si e contrincante tá colérico di carácter, irité.» Si observá bon, ora ta duda o cuestioná De Jongh-Elhage su supuesto integridad, e ta pèrdè còntròl. Méster sigui irité, persiguié, no méster duné or’i porta. Méster atendé urgentemente cu e imagen di mama di nashón qu tá cultivando rond di je. Algún luna so tin. No tin tempu di pèrdè. E tá makamba su arma principal.

Nós tambe lo bai den consulta pa mira cu quico nós por aportá.

Papiamentu Bibu



E bitácora aquí tá abrí pa reacshón. Tur reacshón tá someté na moderashón y solamente lo sali publicá si e «bitacorístanan» ta haña qu ta trata di un reacshón constructivo (no necesariamente mester tá di acuerdo cu nós).