Ofensiva Final
Mashá aña pasá paulatinamente, «bibando den mondongo di e mònster» manera José Martí a bisa, nós a llega na e realisashón qu nos patria antillano mester a bira independiente. Nós a cuminsá scirbi y traducí y duna amor na papiamentu, mescos qu méster duna amor na tur cos pa e por crece y floria.
Papiamentu tábata y tá e vehículo di nos consenshi. Después di a bolbe Patria pa mil y un motibu nós a pasa nos deseo di mira nos cas independiente na un di dos lugá. A forma famía, yu a bin na mundu.
Na 1996/97 nós a cera amistad cu un macamba. Un amistad qu a desarollá mas allá di un símpel amistad. Di nos parti nós a consider’é un hermandad. Tin un principio qu sémper a goberná nos bida, tá mandamentu den nos bida, un principio qu a nutri nós, pegá na pechu di nos mama. Nós tá e rasa criollo pa excelencia: africano, inján, hudíu, chinés, alemán. Nós tá yu di e embrollo caribe: nós tá tur y nós tá nada. Nós tá loque e filósofo mexicano José Vasconcelos a llama «rasa cósmico». Esaqui tá e genética qu nós a haña na pechu di nos mama. Y hungando ninichi den curá di scol y den bario na Santa María, nos amígunan di mucha tábata principalmente yu di tera di coló di cueru pretu. Nós no sa mihó qu ni coló ni «rasa» no tábata forma ningún barera. Nós tábata bula waya tur día bai hunga na cas di nos amígunan. Alla nós a siña come «carni pretu» (igra), cabritu y pan di fòrnu. Den bario nós a lanta cu tambú.
Y nos tata, un criollo di descendencia surinameño, cargadó di e otro mitar di e stobá genético, tampoco den su trato diario tábata haci distinshón entre hende. Humanismo como principio di bida.
Esaqui tá e berdadero pensamentu revolucionario: humanismo, igualdad di hende, di esún mas póber te esún mas ricu. Y sí, den e sentido aquí Cristu tábata un revolucionario simbolisando amor pa próhimo, solidarismo y compashón.
Nós ta bolbe 1996, e aña qu nós a topa y cera conocí cu loque na promé instancia nós a acercá como hulandés. A través di áñanan e amigu hulandés aquí qu quende nós a compartí hopi ora, lentamente a transform’é den un berdadero macamba colonial racista. E promé fisúranan den e amistad a sali na cla día den un acto de represalia a tumba e dos edifícionan na NY.
Su racismo, sémper lorá den idioma tapá, tábata còrda nós riba e tantu moméntunan di encuentro racista cu macamba den nan mes cueba, nan mes mondongo na Paisnan Abóu. Nós a còrda e moméntunan sintá den Mensa (restaurant universitario) comiendo y sintiendo e bístanan riba nós. Y ora ta lanta cara, nós por a contemplá e odio den nan bista. Nós a còrda drentando un supermercado cu un amigu «mas pretu qu anochi», con mirada di odio y desprecio tábata confrontá nós. Nós tábata còrda e día qu nós, na salida di un stashòn di trein, a defendé un mucha macamba qu otro mucha tábata bati (sin qu hende tábata intervení), pa después di nos intervenshón macamba bisa nós: «Tá qui bó ta mete?» Nós a còrda e tantu remárquenan denigrante paquetá den harí cínico. Nos contesta tábata: «Con bo nòmber tá atrobe? Jansen? Warda, no abo tá famía di e nazi macamba Mussert?» Y nán tábata dobla wardá rabu, pa un instante, realisando qu no tábata trata di calque antillano sumiso. E mihó defensa tá ataque frontal. Ma hustamente e posishón aquí tábata haci nós e meta pa nán. Un «zwartje» crítico cu pensamentu independiente tá insoportábel pa e macamba colonial racista.
Nós a «soportá» e relashón aquí precisamente pasobra nós sémper tábatin e speransa qu algún día l’e a mira lus, reconsiderá su posishón y idéanan racista, abyecto y pernicioso.
En bano. Na 2007 e amistad a quibra y 2007 a bira, pa motibu di e historia aquí, e momento qu nós a bolbe na e lucha pa libertad. Papiamentu Bibu, ya años den incubashón, a nace.
Nós no a pèrdè speransa qu algún día macamba lo humanisá. Ma esey ya no tá nos asuntu. Loque únicamente ta importá nós awor tá nos libertad, nos libertad incondishonal, independencia y soberanía como factor pa por crea y logra pa Patria desarollo y bienestar duradero y berdadero.
Nos felicidad, libertad, independencia y soberanía tá diametralmente opuesto na macamba su interés propio. Pa macamba por sigui haci loque e tá haciendo ya pa cuátershen aña, nós no por tá líber, nós no por tá independiente, nós no por tá soberano. Al contrario, nós méster tá sumiso, recurso, recurso humano manera nós tábata sémper.
Mantenshón di e status quo, sea Colonia o Colonia Plus, no ta hiba nós ningún caminda. No ta existí ningún clase di desarollo, ni cu supuesto saneamentu di debe, qu lo hiba nós na desarollo duradero pasobra e fundeshi di e cas ta mal trahá, ya pa cuátershen aña. Y Opshón SI ta afectá e fundeshi mas aínda.
Nós lo vota NO, como principio di fin di colonialismo racista parasitario macamba.
Nós lo vota NO, como principio di e caminda pa independencia.
Papiamentu Bibu
No hay comentarios:
Publicar un comentario