Ofensiva Final
Awe nós ta revisá loque nós tá bisando ya pa dos aña. Promé qu nós resumí, nós ta pidi atenshón pa un entrevista na Z86 den e programa Pèrspèctiva (11/5/2009). Ta trata di un entrevista cu «honorábel » hues Bob Wit.
Su lenguahe y esún di Heyden tábata pata-pata di eufemismo y mitar bèrdad loque ta redundá realmente den falacia y mentira pa tapa esún realidad qu ta determiná nós: colonia. Nós lo trata di analis’é na caminda pa referéndum (probablemente mañán) como un capítulo mas den e serie Declarashón Final.
Laga nós como aperitivo duna ehemplo. Den e entrevista ta menshoná e concepto «déficit den reino» loque tá un eufemismo pa «nós no tin nada di bisa», pasobra Conseho di Miníster di Reino ta consistí di Conseho di Minister macamba cu dos miníster plenipotenciario como decorashón di fondo sin bos ni voto. Declarashón Final no solamente lo no cambia esey, sino l’e fortifiqu’é. Nós a llam’é profundisashón y ampliashón di dominio colonial racista macamba. P’esey nós a llama e diferencia entre Nò y Sí, e diferencia entre Colonia y Colonia Plus.
Wit a menshoná «autonomía crequeché», por lo tanto, te na ora por papia di autonomía den su bista y tantu otro hende mas, ta papia di un autonomía qu no ta funshoná. ¿Paquico e no ta funshoná? Riba esey Wit no ta bisa nada. Pues, autonomía tá un sistema corupto, producto di dominio colonial racista macamba, producto di un sique corupto. Un sistema qu tá fundamentalmente corupto, no ta funshoná.
Tambe Wit a bisa qu «Hulanda tin qu queda riba distancia riba hopi cos». ¿Cua «hopi» cos? ¿No tá supuestamente únicamente macamba su prerrogativa atendé cu relashonan exterior y defensa según defensornan di e documento colonial Statüt? ¿Cua otro cos sí, y cua otro nos nò? Nós a tende hende defendé Statüt (entre otro campo Nò), argumentando qu Statüt ta pèrmití macamba un intervenshón limitá. ¿Ma no tá intervenshón o intervenshón «limitá» , según Statüt, tá colonial den su esencia? ¿Y intervenshón basá riba cua argumento? ¿Garantía di Derecho humano y Democracia? ¿E violadornan di derecho humano (ya durante cuátershen aña ta viola e deréchonan mas fundamental di un pueblo) y democracia (sí pasobra colonialismo no tá democrático; colonialismo tá sino fono), nán, e violadornan permanente di derecho humano y democracia ta papia di derecho humano y democracia? Un sociedad totalitario, totalmente dominá pa cèn y interés propio, no tá democrático.
Tur hende ta discutí riba asuntu, ma nós no ta atendé cu esencia di e asuntu.
Finalmente Wit a bisa qu políticonan no sa qu tin otro mundu ey fó. Nán, e políticonan ta quere qu solamente Còrçáo y Hulanda ta existí. Hmmm… ¿Unda nós a lesa esey atrobe? ¡Ma tá claro, nò! Esey tá e notorio Tapaqueshi Macamba Colonial Racista bou di cua nós tá bibando. Como nós tá bou di e tapaqueshi macamba, nós vishón tá limitá. Nos vishón tá di tal manera limitá qu nós tá regalando macamba teritorio, qu macamba tá anexando. Nós ta quere qu nós tá haciendo nós mes y ótronan un fabor desbaratando Antilla, sin qu nós a realisá nós qu nós tá lagando nos rumanan di Boneiru, Saba y St. Eustacio na calla y qu anecshón lo resultá un bia mas den apartheid macamba. Esún qu ta bai Boneiru awor , ya por mira ehecushón di Apartheid.
Asina nós a llega na nos tópico di awe: Pensa líber di mentira. O sea, busca bèrdad.
Nós tá propagando ya pa dos aña e concéptonan qu ta determiná nós. Alternativamente a formulá nán como documento histórico-político y como análisis lingüístico. Algún concepto a sali publicá den e serie Islanan Inútil, algún den e serie Prostitushón di Idioma, otro partí aqui y alla. Pa mayó facilidad, nós a agrupá tur opinión bou di Punto di Bista.
Nos punto di partida tá claridad lingüístico, papia bèrdad, llama e asuntu na su nòmber. Esey ta requerí un cambio di 180o. Precisamente durante e sirbishi di misa diadomingu na Iglesia Grasia Abundante pastor Varlack ta puntra un grupo di hoben quico nòmber di e grupo 180o quièr men. Nán contesta: 180o tá nificá ora bó bira lomba pa mundu, bó ta bira shentiochenta grado cu cara pa Señor.
Nós a hañ’é un excelente comparashón pa cu loque nós tá propagando ya pa dos aña. Cristalisashón di loque a cuminsá haña forma 28 aña pasá. Pensamentu soberano y líber, líber di mentira y falacia, líber di tur nònsèns colonial racista, ta requerí haci un buelta di 180o pa cu mentira, falacia, falsificashón di historia di cuátershen aña.
José Martí, e apòstel di independencia cubano, a bisa «Yo conozco e monstruo y he vivido en sus entrañas». Tá «privilegio» di esnán qu a biba den mondongo di e mònster macamba, bibando mei-mei di nán den nan mondongo, pa por determiná e cáncer, e putrefacshón, determiná e tapaqueshi y su consecuéncianan, e corupshón di cuátershen aña di colonialismo, ocupashón, opreshón, sclabitud y genocidio.
Si e victima tá marcá pa e crimen, ¿anto quico ta para pa esún qu a cometé e crimen? Si un pueblo tá marcá pa cuátershen aña di teror, ¿quico ta para pa e terorista?
Quita e cápanan for di nos bista pa nos por mira realidad, manera e gran escritor surinameño Albert Helman a scirbi den E Tortura di El Dorado, tábata un proceso lento, penoso y revelador. Poco-poco nós a bin realisá quico cuátershen aña di mentira, indoctrinashón, teror y mas teror a duna como resultado: un colonisadó racista qu ta tapa su barbarismo cu mentira y falsificashón di historia, apoyá pa médionan di comunicashón y científiconan cómplice pa tapa bèrdad. Y un víctima condishoná pa cuátershen aña di barbarismo y teror. Un teror total o totalitario qu a crea un hende qu instintivamente ta busca su sobrebibencia. Un ehemplo clásico tá esún qu ta defendé e burdugu contra su mes héndenan. Teror tábata asina totalitario y profundo qu ya no tábata necesario mas aplicá instruméntonan di carácter físico pa instituí miedu. E víctima a bira manehábel a còntròl remoto.
Esey tá e meta: quita miedu. Sacudí quita miedu. Simón Bolívar a scirbi qu «un pueblo ignorante tá un arma ciegu di su propio destrucshón». No solamente ignorancia tá autodestructivo, sino qu un pueblo terorisá ya cuátershen aña qu no ta libra curpa di cuátershen aña di ignorancia y mentira, lo no tá líber nunca.
Ora e gran surinameño Anton de Kom, qu por cierto a fallecé na final di di dos guera mundial den un campo di concentrashón alemán luchando contra ocupashón nazi, a scirbi su buqui «Nós catibu di Surnam», e no tábata quièr men hende na cadena físicamente, sino sclabitud mental , sumishón na bo burdugu, a pesar di no tá na cadena mas, como consecuencia di tantu siglo di barbarismo y teror ehecutá pa é maéstronan di teror, pues nán a crea nan estado cu teror y nan historia cuátershen aña después ta marcá pa teror.
Nós ta ripití e palábranan di Simón Bolívar: «Un pueblo ignorante tá un arma ciegu di su propio destrucshón.» Su contrali tá conocementu, conocementu berdadero, conocementu histórico, consenshi histórico.
Pues no solamente bèrdad lo liberabu, sino tambe bèrdad lo hacibu soberano.
Mañán nós lo sigui cu e di dos parti di e artículo aquí.
Papiamentu Bibu
No hay comentarios:
Publicar un comentario