Hulandés Europeo

Awe nós ta publicá un excelente artículo / remetido di sr. Roald Helm qu a sali den Amigoe fechá 15/10/2008.

Fuente di e artículo tá Europese Nederlanders

¿Paquico nós ta publiqué (traducí)? Pasobra na promé lugá e tá ehemplo di un persona consciente y líber. E tá ehemplo di un hende qu a sali for di e tapaqueshi macamba qu tin asina tantu di nos héndenan ta dualu.

Ta llena nós di alegría mira un compatriota analisá nos posishón den un contexto mas amplio (geopolítico). Den diferente escrito Papiamentu Bibu a pone atenshón riba e condishón aquí pa por llega na independencia.

Sr. Helm a comprondé esencia di e problema, y por lo tanto esencia di e solushón.

E problema tá: queda bou di colonisashón racista macamba no ta hiba nós ningún caminda. Es mas, e ta hiba nós atrás. Helm tá cla: «Permanencia den Reino di Paisnan Abóu ta haci nós materialmente póber y, mas importante aínda, moralmente póber.»

E solushón tá: Independencia. Nada mas. Méster sali for di e tapaqueshi macamba pa por logra progreso y bienestar berdadero y duradero. No tin otro caminda.

Esaqui Papiamentu Bibu tá bisando mashá tempu caba. Independencia tá e único condishón pa llega na progreso y bienstar berdadero y duradero. Sin independencia nada tá posíbel. Cu independencia, en principio, tur cos tá posibel.

Nós ta laga sr. Helm na palabra:

Estimado sr. / sra. van Wijngaarden,

Mí ta gradicibu mashá pa bo remetido di 10 di òctober den corant Amigoe. Danqui na bó un biá mas mí por iluminá mi punto di bista. Cada pueblo méster ambishoná progreso y bienestar. Pa logra progreso y bienestar méster emancipá. Pa emancipá méster tá líber. Solamente tin libertad ora ta papia di derecho di autodeterminashón. E forma máximo di autodeterminashón tá independencia. P’esey pa yu’i Còrçáo independencia tá conditio sine que non pa por generá progreso y bienestar. E momento t’ey pa logra independencia. Después di di dos guera mundial atrobe a definí orden mundial. Pa preshón di exterior e colonisadó obligatoriamente a concedé nós autonomía. E crisis actual (alimento, energía, materia prima, crédito, liderazgo) den mundo occidental lo conducí na otro ordenashón. Por lo tanto pa nós awor tá e momento pa logra nos libertad (y por lo tanto nos progreso y bienestar). Un permanencia prolongá den Reino di Paisnan Abóu ta haci nós tantu materialmente y, mas importante aínda, moralmente póber. En realidad nós tá ladrón di nós mes. Sin embargo tá un logro hábil di e colonisadó. Pa loque ta trata esey: Mí rèspèt pa e colonisadó.

Loque ta disgustami tá inconfiabilidad, hipocresía, midi cu dos midí, inhusticia, arrogancia, sentido di superioridad inoportuno y deshonestidad. Esaqui tá mi marco di referencia. Difícilmente por ninga un persona di tin balor qu ta scohe pa lanta un forma di bida den exterior. Ta scapa mi atenshón completamente unda a saca e conclushón di un Hulanda sigur. Punta tur e curasoléñonan qu ta biba na Paisnan Abou bou di circunstáncianan pésimo. E echo qu algún di nós (entre nán ami) sí a logra tá mas bien a pesar di qu danqui na hulandés europeo.

Tanten yu’i Còrçáo no risca expres’é na fabor di independencia no tin ningún sentido pa duna un aporte na reedificashón di Còrçáo. Un para ta traha un nèshi den libertad. Para den couchi no ta haci esey. Qu ótronan quièr facilitá e colonisadó den su empeño pa dominá y tene yu’i Còrçáo atrás tá nán asuntu. Di hende qu ta hòrta su mes pueblo no por spera nada otro. N’e momento qu yu’i Còrçáo ta expres’é pa independencia e por conta cu mi sostén y lo mí t’ey manera bolo pa duna mi aporte. Na e referéndum e yu’i Còrçáo tin e promé oportunidad. Na e siguiente elecshón atrobe e tin un oportunidad. Además diariamente yu’i Còrçáo (vía demostrashón, manifestashón etc) tin e oportunidad di exigí su libertad. Den mi vishón e hulandés europeo tá obstáculo den direcshón di independencia. Ora di independencia nós lo ripará realmente quen tin balor y curashi y quen lo hui. E ora ey nós lo ripará quen tá e berdadero yu’i Còrçáo.

Entre e renglonan tambe bó a puntra paquico aínda mí tá bibando na Paisnan Abou (tera di hulandesnan europeo). Mashá símpel. Mí no ta laga guía mi bida pa deficiencia di otro hende. Riba esey con qu bai bin mí no tin influencia. Ya qu mí conocé e DNA moral, pues nunca por sorprendemi, frustrami o desapuntami. Al contrario, pa su predecibilidad mí ta saca bentaha.

Roald J. Helm

Purmerend