Den Amigoe di 15/4 Jesus-Leito na palabra:
«Vota NO tá vota contra autonomía y na fabor di Wilders.» Según Jesus-Leito nós no a entregá nada di nos autonomía. Mas aléu el ta bisa qu «tur partido na 2005 tábata na fabor di supervishón financiero».
«Supervishón lo a bira asuntu di reino y nós a logra hacié un asuntu común cu representashón antillano.»
Según Jesus-Leito supervishón financiero no ta mishi cu nos autonomía. E Colegio di Supervishón no por duna instrucshón, solamente conseho.»
Tin be nós ta puntra nós mes si nos políticonan, y específicamente Jesus-Leito, ta balotá inteligencia humano. Nós no ta mira paquico votamentu pa referéndum, sea SI o NO, tin algu di aber cu rassista Wilders. Si tá pasobra supuestamente su partido quièr «saca» Antilla for di reino, anto nos serie tocante Wilders ta proba precisamente lo contrario. Si tá pa Wilders su fascismo nazi, anto por bisa esey di tur otro partido macamba, incluso SP di Raak. Tábata, y nós lo bolbe ripití, SP qu años atrás cu e notorio «Gastarbeiders Nota» a laga sa qu strañero méster adaptá o laga cai. E mesún sino-fono fascista nazi ey tantu aña después Raak tá exhibiendo contra Antilla. Por lo tanto SP tá un partido proto-fascista nazi. O sea di tur banda den Jesus-Leito su reino e tá changá pa macamba rassista fascista nazi.
Si supervishón, ley di consenso, penetrashón di macamba den nos sistema fiscal y financiero, nos sistema hudicial, concordancia di ley (lesa adaptá nos leynan na di nán), cambia educashón na papiamentu pa hulandés etc., etc., etc no tá «entregá nada di nos autonomía», quico e tá antó?
Además, manera nós a comprobá, nos autonomía tábata un ilushón. Nós ta referí na diferente escrito riba e bitácora aquí.
Supervishón financiero tá un instrumento di gobièrnu di reino, y gobièrnu di reino tá macamba. Nos representante tá decorashón di fondo sin bos ni voto.
Den e mesún Amigoe ta sali e noticia qu atrobe lo por scucha e programa Consenshi Civil di Helmien Wiels na radio. Nós tá contentu qu esey tá e caso atrobe. Ban weta awor di qui manera ta bai purba censuré. Nós tá curioso.
Amigoe di 15/4 tambe ta relatá qu Aliansa Patriótico lo no haci caso na e carta / petishón qu famíanan di e defúntunan Da Costa Gomez y Jonckheer a haci. Un decishón corecto. Como figúranan histórico, loque nán a bisa y haci ya tá dominio público.
La Prensa di 15/4
Riba portada di La Prensa ta para e siguiente noticia:
«Antia lo no tá presente na Cumbre de las Americas.»
Según La Prensa lo tá presente héfenan di estado di paisnan miembro di Organisashón di Estádonan Americano (O.E.A.). «Antilla no tá miembro di O.E.A. qu tá solamente pa paisnan independiente. Antilla a purba si por a manda un observador pa e encuentro importante aquí pa nos hemisferio», según La Prensa.
La Prensa ta menshoná qu e único hende qu a haña invitashón tá e embahador di reino (lesa Paisnan Abóu) na Trinidad.
La Prensa ta sigui: «La Prensa kier a apuntá ku tòg ta parse un bèrgwensa ku Antia no por ta presente na un reunion di e magnitut akí. Nos ta komprondé ku tin regla di wega, pero e situashon ta ilustrativo ku Antia te awe no a logra definí lugá den nos propio hemisferio.»
Sobrá detalle di e relato no tá relevante.
Wèl, La Prensa ta haña qu tá un bèrgüenza qu nós no por participá. Lo nos bisa: Lesa Statüt. Tur loque tin di aber cu relashonan exterior, tá asuntu di reino, por lo tanto un asuntu macamba. Aqui manera den mayoría asuntu, y tambe diferente otro asuntu interno, nós no tin ni bos ni voto, nós no tin nada di bisa.
Tá otro prueba, un bes mas, qu nós tá colonia, por lo tanto someté na loque macamba dicidí.
Tá pa e motibu aquí qu nós no por bira miembro di Caricom, nós no por afiliá na Alba, nós no por probechá di e bentáhanan di Petrocaribe (petroli mas barata) etc., etc, etc.
Awor La Prensa su Skina di Sòrti di 15/4
Un citado for di Skina di Sòrti:
«E lokual ta pasando no tin nada pero nada di haber ku duna informashon na un komunidat pa e por ekspresá su opinion riba e lokual a keda akordá. Tin kestion di intimidashon. Tin defendementu di posishon i interes polítiko. E lokual ta pasando no tin nada di haber ku un proseso di emansipashon. E no tin nada di haber ku ehersementu di derecho di outodeterminashon. “Right to self-determination is the right of peoples to freely determine their political status; and freely pursue their economic, social and cultural development”.»
«E kestion di solushon di debe, pa e islanan por tin un “gezonde startpositie”, ta un elemento ku a agendá (mi ta kuestioná su valides komo argumento pa midi e proseso estatal), i ku e ulandesnan a usa (malusá) pa logra nan ophetivonan stratégiko.»
«E ophetivonan stratégiko ulandes (klaramente redaktá den e “Rijksbegroting 2007” i esun di 2008) no por ta esnan ku nos tin di usa pa midi lokual a keda realisá. E ophetivonan ta esnan ku a presentá na komunidat ora ku a buska e mandato pa bai negoshá e akuerdonan estatal. Ami tin masha problema mes ku e táktika ku ta utilisando pa bende Si. Mi tin masha hopi problema mes ku kalke aserkamentu ku ta den direkshon di spanta hende pa e bai den sierto direkshon.»
Te aquí Sòrti. Nós a scohe un parti di su artículo. Wèl, Sòrti a mira «e ora di fòrnunan y solamente méster mira lus». Sí, exactamente, macamba su táctica no tin nada di aber cu debe, sigur nò si ta laga un parti sustancial di e debe intacto. E tin solamente di aber cu nan interesnan. Y e interesnan ey nán ta sirbi mihó profundisando y ampliando nan dominio colonial racista. Y pa por ampli’é méster recuperá e tereno qu nán paulatinamente a pèrdè a través di e ultimo 55 áñanan di Statüt. Durante 55 aña, aunque den tur sentido di palabra colonial, nán méster a cede influencia na tur nivel y especialmente na nivel educativo y cultural. Ta p’esey qu nós a bisa den e artículo Colonia o Colonia Plus qu «Declarashón Final tá un Declarashón Final di Dominio Colonial Racista Abrí y Total contra nós».
Tin mas noticia qu nós lo por comentá. Nos ta lagu’é te aqui.
Papiamentu Bibu
No hay comentarios:
Publicar un comentario