Simán pasá nós a cumpli cu e convocatoria di asistí na e di dos Conferencia di Independencia. Nós ta ripití loque nós a bisa di e promé conferencia: «discushón riba independencia definitivamente a sali for di scuridad y drenta Gran Sala. Y asina méster tá. E no tá un discushón mas den clandestinidad. Y asina méster tá. E tá birando un discushón-lucha na cua élite curasoleño a cuminsá participá. Y asina méster tá.»
Nós a scucha cu atenshón pa percibí y sinti e nivel di consenshi qu nós héndenan tin pa dicidí pa caba pa independencia.
Mescos qu e promé conferencia, nós ta bolbe nota qu si nós bisa qu tur cos tábata perfecto, nós tá cómplice. Nós remárquenan tá sémper bai constructivo pa profundisá nos dialéctica descolonizador.
Mescos qu e promé conferencia nós a percibí un uzo cauteloso den nos idioma pa por definí colonialismo makamba y especialmente definí nos mes posishón. Un ehèmpel clásico tábata e discurso di sr. Abdul di Boneiru. Durante un gran parti e discurso sr. Abdul a uza e palabra «integrashón». Nós, sintá den sala, tábata pensa: «Ma qui ora e palabra mes ta cai.» Finalmente usando un artículo di un hurista makamba sacá for di un di nan tantu revístanan, sr. Abdul ta lanza e palabra «anecshón», prácticamente pidiendo disculpa y bisando qu no tá su palábranan, sino di e profesor en cuestión. A partir di e momento ey, sr. Abdul a sigui uza e palabra corecto anecshón.
Di e excelente conferencia, nós quièr a apuntá lo siguiente relashoná cu un pregunta di público.
Un persona a haci e siguiente pregunta (nós ta formul’é na nos manera) : ¿Si Hulanda ta rechasá e figura di estado líber asociá, qui posibilidad tin pa obligá Hulanda?
E panelístanan sr. Corbin y sr. Abdul a contestá. Ambos contesta nós por condensá na e siguiente manera. Ambos a apelá na tratado y derecho internashonal qu por obligá makamba cumpli.
Riba esaqui y riba un tendencia qu a percibí prácticamente enter anochi, nós ta duna e siguiente comentario final:
Ora ta trata di apelá na tratado y derecho internashonal den nos proceso di descolonisashón, realmente nós tá concediendo makamba e beneficio di duda. ¿Quico nós quièr men? Loque nós quièr men tá qu, nós ta apelá na tratado y derecho internashonal cu e speransa qu makamba lo cumpli ora tá necesario y inevitábel. Tá nificá qu nós tin e speransa, pa chiquitu qu e tá, qu tin algu bon aínda den makamba qu lo conducí nán na cumpli cu tratado y/o derecho internashonal.
¿E posishón ey, e speransa ey tá hustificá?
¿E speransa ey tá hustificá, considerando qu makamba tá ocupando y explotando nos cas prácticamente cuátershen aña?
¿E speransa ey tá hustificá, considerando qu makamba tá culpábel na genocidio di nos antepasádonan inján y néguer?
¿E speransa ey tá hustificá, considerando qu makamba no ta sinti ningún clase di bèrgüenza pa e echo qu aínda tá ocupando y explotando nos cas?
¿E speransa ey tá hustificá, considerando qu makamba tá cómplice y culpábel di mas di un millón asesinato na Iraq y Afganistán?
¿Tá posíbel aínda, si acaso algún día tábata asina, qu por concedé makamba algún balor moral y ético, considerando prácticamente cuátershen aña di barbarismo y crimen qu aínda no a llega na su fin?
Nós contesta tá NÒ. No tá posíbel. E excepshón aqui y alla, tá precisamente esey: un excepshón. Y e excepshonan ta confirmá regla. Excepshón aqui y alla méster declará qu e tá tuma distancia y ta aborecé e crimenan di lesa humanidad qu su antepasádonan a cometé contra nós y qu tá inaceptábel qu aínda nós tá colonia y qu aínda tá explotando nos cas y qu aínda... tá un lista interminábel. Solamente asina nós lo abrí nos curasón p’e como rumán. Mientras tantu no tá asina, e tá pará na otro banda di e liña.
Tá e momento histórico di tuma y fiha posishon. ¿Unda cada unu di nós tá pará? Esnán entre nós qu tá consciente di e momento histórico qu nós ta bibando, no por queda neutral mas. Neutralidad tá complicidad. Neutralidad tá traishón.
Por lo tanto concedé makamba, culpábel di cuátershen aña di crimen y barbarismo, beneficio di duda tá pèrdida di tempu. Papia di un independencia planeá aqui x-cantidad di aña tá similar na «un guera anunciá, tá un guera pèrdí». Discutí riba cumpli cu tratado tal o tal regla di derecho internashonal, tá tempu pèrdí. Planea independencia pa aqui 10-15 aña, tá condená na falla, pasobra makamba lo haci tur lo posíbel pa e falla. Méster dicidí awor riba independencia, cuminsá awor cu e negociashonan pa llega na reconocementu di nos independencia y soberanía y negoshá indemnisashón dénter di un periodo aceptábel di tres pa cuáter aña pa por concluí tur negociashón. Artículo 3 di Resolushón 1514 di N.U. tá un advertencia riba tur e pretéxtonan qu makamba y colaboradornan local lo bin cun’é pa por atrasá y torpedeá independencia.
E pregunta tá: ¿Cua nivel di consenshi nós ta aspirá?
Independencia awó, no aworó.
Papiamentu Bibu
E bitácora aquí tá abrí pa reacshón. Tur reacshón tá someté na moderashón y solamente lo sali publicá si e «bitacorístanan» ta haña qu ta trata di un reacshón constructivo (no necesariamente mester tá di acuerdo cu nós).
No hay comentarios:
Publicar un comentario