Base Militar Strañero 2

Den nos ultimo escrítonan, nós a elaborá riba e motíbunan di e básenan militar strañero na nos tera.

Loque nós no a atendé cun’é tá e pelíguer qu presencia di e básenan militar aquí ta representá pa nós.

Formashón ideológico di mayoría di nos rumanan latino y caribe tá di otro orden qu esún di nós. Nós ta biba quetu bai bou di e tapaqueshi macamba, indoctriná pa e tapaqueshi macamba, torturá y terorisá awor ya casi cuátershen aña, qu nós bista tá nublá. Nos conceptualisashón di realidad na mundu tá limitá pa un idea vago di loque realmente, minimalmente, cuátershen aña di colonisashón ta nificá.

Macamba tá colonizando nós ya cuátershen aña. Sin embargo, mayoría di nós ta llama e fase pos-Statüt autonomía. E periodo actual algún di nós ta llama recolonisashón, loque tá realmente nada otro qu otro fase di e mes un proceso di colonisashón. Nós a llamé un fase di fortificashón y profundisashón di e proceso colonisadó.

E confushón ideológico y sicológico qu nós tin di historia y actualidad ta pone qu nós no tá consciente di loque tá pasando rònd di nós.

Lo anterior tin tur cos di aber cu e tópico di e básenan militar yanki na mundu, y particularmente esunan na Latinoamérica y Caribe.

Nán tá interrelashoná. E raís di nos conceptualisashón tá e confushón ideológico y sicológico qu na su turno tá directamente relashoná qu e echo qu nós tin cuátershen aña bibando bou di e tapaqueshi macamba, e tapaqueshi macamba qu e sclavisá nós, terorisá nós, asesiná nós, qu a haci hende dócil di nós, manehábel na distancia. E sistema terorista macamba tá asina total, o totalitario, qu generalmente un palabra so tá suficiente pa controlá nós (ehemplo awor no tá al caso).

¿Quico antó lo anterior tin di aber cu básenan militar yanki y macamba?

Mientras tin un discushón fundamental tumando lugá na Latinoamérica riba e básenan militar mericano na diferente pais manera Honduras, Salvador y awor shete base militar nobo na Colombia, nós ta «hospedá» dos base militar strañero, macamba y yanki, den Venezuela su porta di cas. Esey tá haci e básenan militar yanki y macamba muchu mas peligroso pa Venezuela qu calque base na Colombia o otro parti di Latinoamérica o Caribe.

¿Quico esey ta nificá pa nós? ¿Presencia di e básenan militar den un futuro conflicto entre yanki y macamba na un banda y venezolano na e otro banda, ta haci di nos tera teritorio di guera qu tur su consecuéncianan nefasto.

E básenan militar strañero, violando nos soberanía secuestrá pa macamba, tá un pelíguer directo pa nós den caso di un conflicto militar.

Un motibu mas pa bira independiente.

Awor qu un imperio debilitá, cu cooperashón macamba, ta bai haci tur lo posíbel pa reconquistá su influencia pèrdí, nos independencia tá mas urgente qu nunca pa quita e pelíguer aquí for di nos curpa.


Papiamentu Bibu