E siguiente idéanan a surgi relashoná cu un artículo den Antilliaans Dagblad scirbí pa e parlamentárionan Schinkelshoek y van Bochove di CDA, titulá Argwaan rond Antilliaanse dekolonisatie. E artículo mes den Antilliaans Dagblad a sali publicá algún día promé den Volkskrant. Su enlace tá: Argwaan rond laatste dekolonisatie.
Ya den e artículo anterior nós a exponé nos idéanan riba concéptonan manera decolonisashón, recolonisashón y independencia. Nós ta bolbe exponé nán aqui.
Nos ponencia tá e siguiente: Aínda nós tá colonia. De facto y de jure.
Con demostrá esey? Na promé lugá por demostré definiendo e concepto autonomía. Un teritorio autónomo ta traha su propio leynan y, por lo tanto, tin su propio sistema di gobernashón sin influencia di un sistema di afó. Considerando e échonan histórico di ocupashón colonial racista macamba, por llega na e conclushón qu nós no tá autónomo. Sémper nós tábata y aínda nós, como teritorio ocupá pa macamba, tá continuamente bou di influencia y preshón colonial macamba a través di por ehemplo concordancia di ley, educashón, idioma, política, sistema hudicial, Sticusa antes, etc, etc, etc. Awor atrobe nós tá bou di preshón relashoná cu por ehemplo e supuesto emancipashón di homosexual, enter e bululú rònd refinería Isla. Cu otro palabra: autonomía no ta existí, pasobra nós sociedad tá permanentemente bou di preshón macamba. Un asuntu totalmente diferente tá si ta llega na cooperashón y tratado como país soberano, manera tá e caso cu Unión Europeo. Finalmente a maltratá y violá e concepto pa tapa loque internashonalmente for di áñanan 40-50 tá inaceptábel: pa tin o pa tá un colonia. Por lo tanto tá un eror histórico qu nos representántenan e tempu allá dilanti Nashonan Uní a declará qu de facto nós tá teritorio autónomo y asina incorectamente libra Paisnan Abóu di su obligashón di raportá na Comishón di Decolonisashón. (Esaqui tábata finalmente e meta). De facto nós tá colonia.
Statüt ta duna amplio posibilidad pa Paisnan Abóu por intervení den nos supuesto propio asúntunan. Aparte di e llamado asúntunan di reino manera formulá den artículo 3 (relashonan exterior y representashón na Nashonan Uní) tá prueba suficiente qu nós no tá independiente, por lo tanto colonia. Además, formulashonan manera bon gobernashón i derecho humano (art. 43) tá mes flexíbel qu e necesidad colonial di intervení. ¿Paquico? Pasobra si fraude den mundu di construcshón na Paisnan Abóu, un di e cásonan criminal di fraude mas grandi, no a duna ningún resultado y no a conducí na nada, y awor apenas algún aña después tur cos tá ‘bussiness as usual’, anto e colonisadó no tin derecho di papia. E punto final di intervenshón colonial, qu conocé diferente fase, es decir e decishonan qu méster cai den gobièrnu colonial di reino cu su dos figurántenan antillano (miníster plenipotenciario) como decoro di fondo, tá aínda mas prueba qu nós tá colonia. P’esey den ningún sentido nós tá di acuerdo cu esnán qu ta pretendé qu tá afectando nos autonomía. Nos supuesto autonomía simplemente no tá existí. Den esencia nos structura colonial racista Statüt, e tapaqueshi macamba, tá comparábel cu Suráfrica su bántustan. Statüt tá expreshón hurídico di e status colonial di Antilla y Aruba. De jure nós tá colonia.
Siguiendo e liña qu nós a cuminsá pa mantené un idioma puru líber di eufemismo y mentira, nós a referí den pasado na loque nós ta llama gobièrnu, sea antillano o insular, como administrashón colonial local. Ambos administrashón, insular y central, tá directamente someté na macamba y tá, por lo tanto, extenshón di gobièrnu colonial macamba. E concepto gobièrnu por tá solamente reservá pa un país independiente y soberano.
Ta nificá qu e concéptonan autonomía y recolonisashón tá ambos malusá. Mescos ta conta pa e concéptonan estado, país, areglo di estado y derecho di autodeterminashón. E proceso actual qu a cuminsá cu e notorio declarashón final tá pa fortificá dominio colonial macamba. Den maluso, violashón y prostitushón di concepto y idioma, e colonisadó tá experto. Un ehemplo: e guéranan di opreshón colonial contra Indonesia aínda nán ta llama Acshonan Policial. Mira p.e. e artículo di Schinkelshoek y Bochove den Antilliaans Dagblad. Ta referí na e guéranan colonial aquí cu e formulashón «De worsteling rond Indonesie».
Prueba actual. Nada mas al caso qu prueba actual.
E artículo den AD obviamente tá un hoya como prueba. Schinkelshoek y van Bochove ta llama e actual consolidashón di dominio colonial «decolonisashón». Na promé lugá decolonisashón ta nificá pone un fin na structura y dominio colonial. E único proceso qu ta conducí na esey tá independencia. Tur proceso di decolonisashón méster conducí na independencia. Cu otro palabra Schinkelshoek y van Bochove ta malusá y ta prostituí e concepto decolonisashón. Schinkelshoek y van Bochove ta cometé falsificashón di historia consciente y deliberá: mentira colonial únicamente ta sirbi interés colonial.
Finalmente e corona riba e prueba. E título Argwaan rond Antilliaanse dekolonisatie. Aqui ta trata di un confeshón. Schinkelshoek y van Bochove ta scirbi qu ta trata di decolonisashón. Esaqui ta nificá qu en todo caso nán ta admití qu, si sigún nán nós tá decolonisando, anto nós tá colonia aínda. Si ta trata di colonisashón, anto no por papia di recolonisashón. Si nós no tin di aber cu independencia, anto no por papia di decolonisashón tampoco. Nós tin di aber antó cu un profundisashón y ampliashón di dominio colonial macamba. Cu nan argumentashón Schinkelshoek y van Bochove den un tiru dramáticamente a aclará e asuntu pa tur compatriota antillano y rubiano y a duna un lès den bèrdad di nos realidad colonial. Den un momento di franquesa inusual, e colonisadó, y no Papiamentu Bibu den su «extremismo anticolonial», sí, e colonisadó mes representá pa dos parlamentario ta confesá y admití loque sémper nós tábata y tá aínda: colonia.
¿Paquico e artículo aquí? Na promé lugá mester limpia y deshací e discushón di tur concepto qu e colonisadó a malusá, corumpí y prostituí a través di casi 4 siglo. E paso ey nós mes tin qu tuma. Nós no por spera qu e colonisadó lo tuma e paso ey. Mentíranan colonial ta sirbi únicamente interés colonial. Solamente ora nós tá dispuesto di limpia nos idioma y confrontá e colonisadó cu un lenguahe purificá, y asina confront’é cu su mentíranan, solamente e ora ey, líber di tur decorashón inútil y exceso, e único posiblilidad tá bira evidente: independencia.
Papiamentu Bibu
*******
No hay comentarios:
Publicar un comentario