Manipulashón y Indoctrinashón mediático

Manipulashón mediático, labamentu di celéber y tur otro clase di propaganda colonial, ta forma parti di loque awendía llama guera di cuarto generashón. E bombardeo tá incesante, riguroso y inclemente.

Den e artículo Monopolio Mediático y Manipulashón Mediático nós a exponé e matrisan di opinión qu entre otro makamba ta uza pa crea un expediente pa tin pretexto pa por intervení. Cu e tácticanan aquí a logra propiná MEP un derota fulminante na Aruba.

Guera asimétrico tá e guera qu nós ta hiba como pueblo oprimí qu deseosamente ta busca su liberashón y consiguientemente su libertad como e meta supremo. Guera asimétrico tá e fuente de creatividad propio di un pueblo oprimí qu tin husticia sémper su banda. Por lo tanto victoria final. Tur lucha di libertad sémper tá hustificá pasobra su esencia, qu tá libertad, su tá (tá o no ta, tá e dilema), tá su strategia pa cada un di nós na nivel personal como resultado di e gran meta: libertad colectivo como pueblo. O bó ta líber, o bó no tá líber. No tin algu entre e dos opshonan aquí. P’esey independencia, libertad, soberanía tá asemehá bida propiamente.

E meta supremo aquí tá hustificá e métodonan o tácticanan. Táctica y strategia tá íntimamente entrelasá. Táctica ta sirbi strategia pa por logra e meta. Táctica sin strategia, no tin sentido. Táctica sin strategia tá manera un barcu sin destinashón. Strategia sin táctica irrevocablemente lo falla.

Libertad tá nos strategia. Táctica tá e métodonan, e guera asimétrico y di cuarto generashón, qu nós lo uza pa logra nos strategia.

Nós ta bolbe principio. Libertad, tá un so tin. No tin diferente forma di libertad. No tin algu entre medio. O bó tá líber o bó no tá líber. Por lo tanto, e pretenshón qu quedando bou di e Tapaqueshi Makamba tá garantisá nos libertad, tá un contradicshón. E falacia qu por ehemplo un corant manera Ultimo tá propagando, es decir qu a bende nos libertad, tá incorecto. No por existí libertad como colonia makamba. No ta existí libertad bou di e Tapaqueshi Makamba.

Cu e breve esboso aquí mesora nós ta desnudá naturalesa di loque asina tantu di nós tá llama reino, «partner» den reino. Tur structura estatal qu ta pèrmití makamba tin algu di bisa riba nos bida diario, directamente o indirectamente, automáticamente ta reprimí nos soberanía y, por lo tanto, nos independencia.

Y asina nós ta llega na naturalesa di e còshèt colonial nefasto qu llama Statüt. Statüt su naturalesa colonial, por lo tanto su carácter opresivo, restrictivo, limitativo di nos soberanía tá contradictorio cu su preámbulo cu ta papia di equivalencia. No tá sin motibu – su motibu sémper tá cu intenshón pernicioso y nefasto – qu e preámbulo no ta papia di igualdad. Simplemente den e mente colonial rassista makamba nós no tá igual. Sémper nós lo tá untermensch: menos qu hende. Además, uzo di e palabra «equivalencia» tá simbolisá e necesidad genético makamba di quièr cuantificá tur cos den balor, preferiblemente cèn, nán único dios. E palabra tá revelador. Jis méster scucha bon y observá bon, manera un remetido di Andres Durand den Amigoe y AD ta siña nós.

Statüt como documento colonial rassista, tin tur elemento den je pa «pacificá», o sea còntròl y dominashón di nos cas. Statüt p.e. ta cuminsá cu duna makamba tur prerogativa riba tereno di defensa, relashonan exterior y nashonalidad. Tur tá atributo di un estado soberano.

Statüt ta duna makamba na tur nivel den nos sociedad cu articulo 43 e posibilidad di intervenshón. Artículo 43 ta bisa:

Inciso 1
Cada un di e paisnan ta percurá pa realisashón di deréchonan y libertadnan humano fundamental, estado di derecho y credibilidad y seguridad di gobièrnu.

Awor ta bin e parti colonial, inciso 2:
Garantía di e deréchonan aquí, libertadnan, estado di derecho y credibilidad y seguridad di gobièrnu ta asuntu di Reino.

¿Y quen ta Reino? Conseho di miníster macamba mas dos figurante antillano (artículo 7 Statüt) sin bos ni voto como decorashón di fondo di e comedia colonial rassista. Y ora tá necesario, tur cos por bira un asuntu di reino, pa por intervení basá riba artículo 43.

Basá riba art.43 inciso 2, tur tópico, tur asuntu manera nán ta haña qu tá bon, makamba por declará asuntu di reino pa supuestamente garantisá deréchonan humano, democracia y bon gobernashón.

E poder colonial aquí di dominashón y còntròl tá den man di makamba, e violadornan di deréchonan humano pa excelencia, e violadornan di nos deréchonan humano ya prácticamente cuátershen aña, ocupando nos cas.

Pa por hustificá nan supuesto permanencia aqui, pa por sigui ocupá, dominá y explotá nos cas, na promé lugá méster indoctriná nós.

Cu mentira y falacia nos héndenan ta quere qu sin makamba nán no tá ningún caminda, qu sin makamba nán no tin derecho di existencia, qu nos cas no tá nada mas qu algún baranca. Ma pa algu e sinbèrgüensanan ta aqui aínda. Pa algu tercamente makamba ta tene duru na e pida baráncanan aquí.

E práctica patalógico nefasto aquí di deshumanisashón por ehèmpel a haña expreshón concreto den e supuesto himno di Frater Radulphus, qu después, aunque modificá, a pa bira nos actual himno. Riba e asuntu aquí, nós tá preparando un artículo pa laga mira con sutil mayoría be e prácticanan colonial deshumanizante tá. Un aporte mas na e catesashi di liberashón.

E proceso aquí a cuminsá na e promé díanan di colonisashón ora a calificá nós como íslanan inútil. E liña còrá ey a queda core a través di nos historia, fortificá y produndisá pa colonialismo, cámponan di concentrashón, teror y intimidashón makamba, penetrando te den e pártinan mas profundo di nos celéber pa un bia mas borotá na boca di de Jongh-Elhage y tantu otro: Nós mes no por.

Manipulashón mediático como arma pa haci nós muda, desarticulá, inofensivo, inerte tin un bacuna efectivo. Ya nós a menshon’é:  Idioma. Un idioma líber di mentira y falacia. Un idioma goberná pa claridad lingüístico y claridad conceptual.

Manera nós a formul’é den e artículo Claridad Lingüístico:

«Pues si a uza idioma pa deshumanisá un pueblo, e mesún idioma purificá di su mentíranan, falácianan y eufemísmonan tá un di e ármanan principal di emancipashón.»

Nós lo triunfá.

Papiamentu Bibu

E bitácora aquí tá abrí pa reacshón. Tur reacshón tá someté na moderashón y solamente lo sali publicá si e «bitacorístanan» ta haña qu ta trata di un reacshón constructivo (no necesariamente mester tá di acuerdo cu nós).