Diasabra pasá nós tábatin un encuentro cu un gran compatriota. Y nós no ta elogiá pasobra nós sa qu e ta lesa Papiamentu Bibu, sino pa e echo qu e tá un fuente di inspirashón pa su forma crítico di pensa y formulá, su lucha incondishonal. Tá un persona qu continuamente ta bati brecha den e tapaqueshi colonial rassista nazi makamba. Tábata un encuentro fructífero qu a dura casi tres ora y qu por a sigui tres ora mas, si no tábata pa otro compromiso.
Nós a mishi cu asina tantu tópico qu cada unu tá inspirashón pa un sin fin di artículo. Un punto qu nós a trece dilanti y qu ta preocupá nós profundamente tá nos falta di documentashón, historiografía, archivamentu. Pa bisé mas símpel: un cultura di escritor y scirbimentu, a pesar qu nós tin na Còrçáo so cincu corant matutino, tres vespertino y e semanario El Periódico. ¿Nós realisá nós cuantu hende, yu di tera qu aínda tá na bida cargando cu nán historia, experiencia, anécdota, política etc. etc.? ¿Paquico e preocupashón profundo aquí? Laga nós mira.
Papiamentu Bibu a nace como necesidad personal di scirbi. Tá un necesidad qu no tin splicashón. Un necesidad manera pan cu awa tá. Na di dos lugá Papiamentu Bibu tá un laboratorio, un experimento cu nos idioma. Papiamentu Bibu tá un archivo, un biblioteca experimental pa ofrecé un caminda mas pa liberashón. Papiamentu Bibu tá un portal pa otro mundu. Papiamentu Bibu tá un mundu den evolushón. Papiamentu Bibu tá un mundu den revolushón. Papiamentu Bibu tá batalla. E promé batalla tá ideológico. Papiamentu Bibu tá un contraforsa pa mentira y falacia makamba. Ma na último instansha Papiamentu Bibu tá nós, tur loque ta toca nós, na promé lugá y na último lugá.
¿Cua tá nos realidad, ya prácticamente cuátershen aña? Qu e colonisadó, e mesún qu a cometé tur e crimenan di lesa humanidad, e mesún qu a manehá e cámponan di concentrashón na Quenepa y Santa Cruz, e mesún colonisadó qu a deshumanisá nós y aínda tá tratando di deshumanisá nós, e mesún colonisadó rassista qu aínda tá ocupando nos cas, qu tá prostituyendo nos cas, tá esún qu ta scirbi nos historia. E tá esún qu ta monopolisá nos historia y prescribí quico tá nos bèrdad. Es decir, quico e ta haña qu nós méster quere. Di tal manera por ehemplo un texto tocante sclabitud (grupo shete) na un scol público manera Johan van Walbeeck (por cierto un nòmber netamente colonial) ta siña nos yunan qu hende pretu tábata custumá caba cu sclabitud pasobra ora tríbunan africano tábata bringa cu otro, miémbronan di e tribu pèrdedó tábata bira propiedad di e tribu ganadó. Por lo tanto na fundeshi, educashón di nos yunan ya tá contaminá nán mentira y, pió aínda, cu hustificashón di secuestro, deportashón, sclabitud y finalmente genocidio di 150.000.000 pa 200.00.000 néguer y inján. Un nota mas den historia di humanidad.
Asina na e nivel académico mas altu na Makambalandia, seudo-academismo y intelectualismo ta reina ora héndenan manera Emmer y su heredero Oostindie ta monopolisá nos historia, ta apropiá di nos historia, no pa bisa bèrdad, sino pa bagatelisá e genocidio di 150.000.000 pa 200.000.000 inján y néguer. ¿Prueba? Día presidente Chávez a declará públicamente qu loque a pasa na América Latino y Caribe (y continuamente e ta haci referencia na esey) tá genocidio, tá un holocausto, Precisamente seudo-académico Oostindie a sali den publicidad (corant y televishón) pa bisa qu loque presidente Chávez di tá exagerá, qu no por llamé genocidio. Y e punto no tá qu e no ta haña qu ta trata di genocidio. E punto tá qu nós ta quere e bagamunderíanan qu e ta saca for di su boca. Típonan manera Emmer y Oostindie tá profundamente rassista y cómplice pa mantené y cultivá nos ignorancia, e ignorancia qu tá instrumento principal di nan còntròl y dominio colonial rassista. Nán tá parti di e sistema di opreshón y dominio. E funshón di Emmer y Oostindie cu nan seudo-ciencia, tá e mesún funshón qu e séctanan seudo-religioso, seudo-protestant germano tin: purba mata nos lucha pa libertad cu mentira pa controlá y dominá nós. Nán ta papia di hermandad, mientras nán tá e enemigu.
¿Nós tá radical? Sí. Pensamentu martiano (perteneciente na José Martí) ta bisa qu «na raís ta bai e hende berdadero. Radical no tá mas qu esey: esún qu ta bai na raís. No por llama radical es qu no ta mira cos den su fondo». Sí, nós tá radical. Nos quièr mira cos den su fondo. Y siendo radical, por lo tanto nós ta coba pa haña raís, nos raisnan, nós ta topa cu e mentíranan y falácianan qu nós méster «eradicá», saca afó cu raís, pa nos raisnan por crece líber y sin barera, sin estorbo. E tapaqueshi makamba tá manera un pòchi di mata qu tá stroba raís crece. Llamé Statüt, llamé «autonomía», llamé Declarashón Finalm, llamé BES. Tur tá malchi pa frena nos desarrollo berdadero, pa evitá qu nós ta desbordá y por fin, por fin sigui nos mes caminda den harmonía cu nos rumanan den región. Tur mata den un pòchi tin crecementu limitá. Ora ta saca un mata for di un pòchi, nós ta topa cu raís completamente ipac riba otro, qu casi no por hala rosea. Su raís principal pa falta di espacio – su espacio limitá – ta crece deformá. Hinca e mata den suela y lo bó mira con e mata ta crece bai. Su raís mama, su raís principal lo crece atrobe di nobo, lo haña su caminda pa por nutri e mata plenamente pa asina e mata por desarollá sin ningún clase di estorbo. Nos desarollo ta limitá, ya cuátershen aña, pa e tapaqueshi makamba, pa Statüt, pa supuesto autonomía, pa Declarashón Final, cuáter nòmber diferente pa e mesún mònster colonial. Nán tá e málchinan – llamé còshèt pa nos parti – qu tá stroba nos berdadero desarollo y bienestar. Méster eliminá e tapaqueshi makamba pa raís por crece di bèrdad.
Asina nós ta llega caminda nós quièr a llega. Memoria di un pueblo. Un pueblo sin memoria, tá un pueblo sin futuro. Documentashón, registrashón di nos historia, di nos realidad, di nos presente, desconstrucshón di mentira pa crea un idioma nobo líber di mentira como un fuente bibu qu ta nutri nos raisnan – qu ta crea un memoria liberá y nobo. Memoria ta crea consenshi, especialmente consenshi di nos raisnan. Consenshi di nos raisnan ta crea determinashón, dignidad, siguridad, autoestima, confianza, especialmente confianza den nos mes capacidadnan, nos idioma, nos educashón na papiamentu, nos palabra. Finalmente e ta crea un tá, un tá berdadero: tá hende, tá hende digno, tá hende digno cu derecho riba un bida digno, un bida líber, un bida normal. Tá ta crea e noshón profundo qu sí, nós mes por.
Nós lo triunfá.
Papiamentu Bibu
No hay comentarios:
Publicar un comentario