Na caminda pa e momento supremo, basta a papia riba e película. Na tur nivel di sociedad macamba hende tábatin algu di comentá. Na e nivelnan di mas altu, gabinete macamba, a purba convencé Wilders di no saca e película. Hasta a bai asina leu di a cita Wilders na oficina di nan servicio secreto y purba di lagué comprondé e consecuéncianan grave pa Paisnan Abou.
Banda di e pretenshón di no tin nada contra strañero, sémper bai e argumento principal tábata placa. Den diferente artículo ta referí continuamente na interés macamba na mundu. Y ora ta papia di interés macamba, obviamente ta papia di placa. Den un sociedad utilitario manera esún macamba, placa tá comienso y final di día. Placa tá preponderante den soño y pesadilla.
Esún qu no ta comprondé esaqui, no ta comprondé historia macamba.
A pesar di tur preshón for di comunidad macamba finalmente Wilders a publicá Fitna.
For di diferente área di mundu a reacshoná. Asta for di paisnan tradishonalmente colaborativo cu e mundu mericano-anglosahón-macamba manera Jordania, a sali crítica riba e película di Wilders. Indonesia oficialmente a declará Wilders «persona indeseá». E organisashón di empresario macamba, VNO, asta a bai asina leu qu e lo demandá Wilders pa pèrdida qu lo sufri na mundu a consecuencia di boicot di producto macamba.
Indonesia a condená Fitna y Paisnan Abou. Entre tantu ya e promé ataque riba e consulado macamba na Medan a tuma lugá.
Ban Ki Moon, secretario general di Nashonan Uní, oficialmente a condená Fitna pa su carácter ofensivo.
Casi 50% di parlamento di Jordania e pidi pa boicoteá tur producto macamba.
Parlamentárionan iraní a solicitá un quiebro di tus laso diplomático y económico cu Paisnan Abou.
Wilders su película Fitna no tin nada de aber cu libertad di expreshón, sino, mescos qu e insúltonan di su co-partidario Brinkman, tin tur cos di aber cu provocashón, comportamentu indecente y barbarismo.
Por lo tanto, e siguiente simanan nós méster sigui a asuntu aquí di cerca, pasobra e tá di transcendencia pa nós. Mas aléu nós lo detallá mas riba e posíbel vínculonan entre Fitna y Antilla.
Wilders y sobrá
Un pregunta importante tá e siguiente: ¿Paquico Wilders tá asina importante? Es decir, ¿paquico Wilders ta haña asina tantu cobertura y reacshón político y mediático?
Nós a haci nos amigu Marcel Kross, luchadó pa independencia qu a forha independencia di Sürnam, e pregunta aquí. E pregunta aquí a surgi pasobra nós quièr a comprondé paquico figúranan manera Janmaat di «Centrumpartij» no a logra cristalisá un poder político, algu qu figúranan manera Fortuyn, Verdonk y Wilders si a logra y tá logrando.
Marcel Kross ta apuntá tres asuntu:
1. Según Marcel Kross e diferencia tá 9/11. Pa nós por comprondé e diferencia entre Janmaat na un banda, y e coriente Fortuyn, Wilders y Verdonk na otro banda, nós méster tin 9/11/2001 na bista. Es decir, promé qu 9/11 occidente, encabesá pa Merca-Inglatera-Paisnan Abou tábatin e pretenshón di tá preocupá pa tur loque tá strañero. Por a mantené e mentira di tolerancia y anti-racismo pasobra presencia strañero no tábata asina notábel.
Riba 9/11 a gòlpea imperio, y Paisnan Abou, den su curasón, pasobra Paisnan Abou tá parti di imperio como vasallo. E acto militar aquí a cambia situashón mundialmente. Por lo tanto no tábata necesario mas mantené e pretenshón di tolerancia y anti-racismo. A llega, por lo tanto, un fin na hipocresía y barbarismo atrobe abiertamente tábata pan di cada día. A llega un fin na tolerancia y derecho humano y racismo a bolbe brota y manifest’é abiertamente. Cu Janmaat por a mantené e mentira di tolerancia y anti-racismo. Cu Fortuyn Verdonk y Wilders no mas. Janmaat tábata operá promé qu 9/11/2001. E grupo Fortuyn-Verdonk-Wilders tá operando después di 9/11/2001.
Según Marcel Kross, esún qu tábata y ta predicá odio racista ta competí pa liderato pasobra sociedad macamba no tábata y no ta aceptá e hipocresía di antes ey mas.
2. Marcel Kross ta haña e película di Wilders excelente pasobra e ta bisa exactamente loque sociedad macamba ta pensa. ¿Paquico tanto político como mundu mediático tá asina cauteloso cu Wilders? ¿Acaso e tá un solitario qu no tá representativo pa macamba? ¿Paquico Wilders tá tópico diariamente? Wilders tá importante, Wilders tá tópico diariamente pasobra Wilders tá representativo pa loque macamba tá y loque macamba ta pensa. Si Wilders no tábata representativo pa macamba, anto l’e no tábata un problema. Wilders ta papia bèrdad, Wilders tá honesto. Wilders tá portabós pa macamba. Wilders y Verdonk no tá un caso insólito den margen di sociedad macamba, sino representativo pa sociedad macamba. Sobrá ta gloria curpa den hipocresía.
3. Tur partido político ta pisca den e mesún lamán racista. Por lo tanto e coriente Fortuyn-Verdonk-Wilders tá competencia directo den sentido electoral. P’esey Wilders y Verdonk tá importante.
E siguiente pregunta qu nós a hace na Marcel Kross tábata: ¿Pero no ta parce qu Wilders, cu e acto racista aquí, tá afectá interés macamba, placa, directamente? Pues, si mundialmente lo tuma medida contra tur loque tá di procedencia macamba, ¿no tá asina qu Fitna ta afectá interés macamba en bes di sirbi interés macamba? Pues sobrá, tá turdí, molostiá pasobra cu e película aquí nán ta sufri daño económico inmediato y directo.
Wilders, según Marcel Kross, ta parce di tá afectando interés macamba a primera bista. ¿Tá asina?
Bou di superficie Wilders su acto no tá dirigí contra interés macamba. Wilders su meta tá, finalmente, mas asiento den parlamento. Por lo tanto mas poder, mas salario pa mas miembro di parlamento, mas publicidad —y publicidad tá placa—, por lo tanto, finalmente mas placa. Comienso y fin(al) tá placa. Qu e tá afectá interés di su competencia qu tin otro interés, tá bèrdad, pero ta trata di un «guera» entre co-mafiósonan. Esaqui tá un actividad macamba diario. Finalmente, por catalogá e comportamentu di Wilders como un acto di gana placa a través di odio racista. Pues ata e macamba den óptima forma, según Marcel Kross: un jagdó racista riba cèn.
Fitna y Antilla
Ya den algún artículo nós a haci menshón di e echo qu historia macamba, y especialmente historia macamba colonial racista pa sobrá di mundu tá un mancha blancu. Marcel Kross, den su largu trayectoria na fóronan mundial, como e protagonista principal di e lucha independentista di tá Sürnam, testigu di e echo aquí.
Pa mayoría di hende, macamba tá un pueblo particular, qu na un squina di Europa ta producí queshi, ta cultivá tulipán, ta papia un idioma straño, ta bista zapatu di palu, cu un reina straño, pero por lo demás pacífico y inofensivo.
¿Unda tá registrá pa historia qu macamba tábatin un papel preponderante y principal den deportashón di africano, sclabitud, den construí campo di concentrashón etc. etc.? Al contrario, científiconan macamba manera Emmer y Oostindie tá cómplice den tapa y troce bèrdad. Es mas, figúranan manera Emmer ta haña qu macamba no méster sinti bèrgüensa pa sclabitud, pasobra tábata nada mas qu simplemente otro forma di migrashón. Loque nán ta scirbi di nós, ningún hende ta comprondé. Loque ta sali publicá ningún hende quièr refutá. ¿Unda e estudiósonan macamba tá, qu tá papia palabra cla riba nan pasado y presente bárbaro, manera si sa tá e caso na Inglatera y Merca, na resto di Europa? Al contrario, nós ta bolbe ripití, estudiósonan macamba tá cómplice y ta colaborá pa tapa y troce bèrdad.
Ora Brinkman y Wilders ofendé nós, tur insulto y ofensa tá caba cu nos, pero ¿quico mundu sa? Nós tá den un isolashón total hustamente pasobra históricamente nós tá un papel virgen.
Pues, den e artículo Vanguardia y Retaguardia nós ta haci menshón di algún punto pa por llega na independencia. Nos a menshoná na punto 4 qu méster còrta abri e parti moli di bariga di e mònster. Pues ata e parti moli aquí y pa nos gran suèrtè e mònster mes a cuminsá còrta den su mes barica.
Pa caba di benta suèrtè riba suèrtè, ata e iraní Eshan Yami, bibá na Paisnan Abou, qu a bira lomba pa Islam, mescos qu Hirshi Ali, tin pensá di traha un película caminda profeta Mohamed lo figurá cu un erecshón. Esaqui ta caba di tira petroli riba candela y ta caba di abri barica di e mònster.
Nós a quere qu e paso aquí lo tábata mas difícil pa motibu di nos isolashón histórico. Pues, Wilders a haci e trabóu pa nós. Wilders a pone Paisnan Abou riba mapa mundial den un sentido totalmente negativo, pero qu nan cara berdadero y caminda e méster tá: un pais profundamente racista. E informe di Unión Europeo tocante racismo macamba huntu cu e eféctonan di Fitna, lo yuda exponé loque realmente nán tá. Awor mundu sa qu no tá un pueblo inofensivo qu ta bisti zapatu di palu, ta cultivá tulipán, ta producí queshi cu un reina straño y un idioma straño. Sino, contrario, un pueblo profundamente racista.
Awor ta dependé di nós si tras di nan bèrdad como racista, nós ta logra conectá y vinculá nan bèrdad como colonial y asina exponé na fóronan internashonal e compleho colonial-racista qu sémper a dominá y tá dominando nan política pa mas qu treshen aña. Den contexto macamba pa cu nos contexto histórico, racismo y colonialismo tá «dos man riba e mesún barica». Esún no ta existí sin y otro y ta biba den un simbiosis permanente. Den e proceso ey, pa uza terminología biológico, e parásito simbiótico racismo-colonialismo méster di nós como su huesped pa por nutri curpa y sobrebibí. P'esey nós ta importante p'e, pasobra nós tá su último huesped, su último sustrato, qu ta ten'ele na bida.
Pa e movementu independentista, e caso Fitna di Wilders tá un oportunidad di oro qu no méster desperdiciá.
© 2008 Papiamentu Bibu
No hay comentarios:
Publicar un comentario