Islanan Inútil 4

12 di novèmber 2008 a sali den e corant Volkskrant un artículo titulá Gasboringen Venezuela en Rusland Nabij Aruba. Naturalmente esaqui tá un noticia di importancia estratégico.

Aparte di un análisis, tá importante tambe atendé riba un formulashón qu e periodista, un tal Jean Mentens, a uza den e promé alinea.

E prome alinea ta caba cu e frase «Het is voor het eerst dat het olierijke Venezuela ook op zoek gaat naar gas in zijn territoriale wateren - die grenzen aan Nederland.» Tá pa di promé be qu Venezuela, ricu na petroli, tambe lo explorá gas den su áwanan territorial qu ta colindá cu Hulanda.

Ratu-ratu macamba ta quita su máscara y su berdadero carácter colonial ta sali na cla. Mentens no a scirbi Antilla, ni Aruba, ni siquiera e presunto Antilla Hulandés. El a scirbi Hulanda. No ta trata di un eror tipográfico. Ta trata di loque realmente e ta pensa. Esaqui tá un confeshón. Nós a llega di scirbi caba: Pa macamba nós tá di nán. For di tempu di sclabitud, nos antepasádonan tábata di nán. Nós teritorio ocupá ilegalmente pa nán, nán ta considerá di nán. Esey sémper a queda asina.

E motibu principal di e artículo aquí tá e echo qu ta bai explorá gas den áwanan teritorial venezolano. Aparte di e aliansa estratégico geopolítico qu Venezuela e cera cu Rusia pa asina forma un forsa contra imperialismo germano, Rusia tá participando tambe pa motíbunan práctico. Rusia tin experiencia riba e tereno aquí.

Pa nós e noticia tá di importancia estratégico, pasobra mas y mas ta bin sali na cla qu tin motibu qu macamba tá ocupando Antilla ya pa casi cuáter siglo. Tin motibu qu tá haciendo tur lo posíbel pa profundisá e structúranan colonial.

Nós a llega di formulá diferente motibu qu ta demostrá qu Antilla no tá simplemente algún baranca qu no tin nada di ofrecé. Nós ta sugerí lesa E serie Islanan Inútil 1 te 3 (tira un bista den e lista bou di e cabés Punto di Bista).

Nós ta resumí e interesnan macamba qu tin di aber directamente cu e ocupashón colonial racista di nos teritorio:

1. Militar estratégico

2. Teritorial

3. Económico-financiero

Ad 1. Paisnan Abóu como miembro di imperialismo germano, tá forma parti di tur actividad militar y terorista ehecutá pa imperialismo germano. Esaqui nós por proba cu macamba su participashón na e guera di ocupashón y saqueo di Afganistán y Iraq. Presencia di un base militar naval y aéreo macamba y un base militar yanqui tá prueba suficiente qu macamba ta forma un parti integral di e compleho imperial germano. E triángulo germano Merca, Inglatera y Paisnan Abóu den OTAN tá símbolo di e cooperashón aquí.

Ad 2. Anecshón di BES ta nificá aumento di teritorio. E aumento aquí tin tres componente: Aumento di teritorio terestre, aumento di teritorio marítimo y finalmente aumento vía e supuesto zona económico exclusivo. Nós ta sugerí lesa nos artículonan Declarashón Final 1 y Declarashón Final 2 bou di e cabés Punto di Bista.

Ad 3. Finalmente nós tá importante pa nán ocupashón ilegal di nos teritorio como punto di operashón financiero y económico. Nós ta un «punto nodal», un intersecshón importante pa transporte marítimo y aéreo. Nós tá un área estratégico pa petroli, gas y mineral. Nós tá tambe, manera den tempu di sclabitud, recurso humano. E echo qu anualmente 300 pa 400 di nos yunan ta migra bai Paisnan Abóu y di cua mayoría no ta bolbe, ta nificá qu nós tá desarollando Paisnan Abóu y no contrali.

Nós ta sigui insistí: tá di gran importancia qu ta haci un investigashón qu ta presentá un marco preliminar di loque macamba ta gana cu nan ocupashón di nos teritorio. Nós ta bisa esaqui pa e siguiente motíbunan: E promé motibu tá directamente relashoná qu e concepto «nós mes no por» y «nós no ta sirbi». E siguiente motibu ta relashoná cu e concepto Ayudo di desarrollo. Laga nós bisa qu cada invershón ta producí beneficio cu un factor 10. Por lo tanto, si «cèn di desarollo» ta generá beneficio multiplicá cu un factor 10, anto nós por bòltu e concepto Ayudo di desarrollo y duné su nòmber berdadero: Invershón estatal macamba pa explotashón.

Pa loque ta trata materia prima, lo siguiente:

Nós a llega di scirbi qu Antilla tá e «cabés di ceru» di actividad volcánico. Esaqui ta nificá qu potencialmente nós tá ricu na mineral manera níquel, cóper, heru etc etc. E pregunta tá si ta existí un investigashón geológico di nos teritorio. Den nós política nashonal esaqui mester tá primordial. Mescos qu tá a caso cu Constitushón di Venezuela,[1] aínda mas den caso di e futuro Constitushón di Ecuador,[2] mester declará tur materia prima den subsuela antillano, como materia prima estratégico, propiedad inalienábel y intransferíbel di estado.

Y hustamente ey e problema ta sinta. Incorectamente nós ta referí na nos Areglo di Estado como nos Constitushón. Na promé lugá e término constitushón solamente por ta reservá pa un teritorio independiente y soberano. No por papia di autonomía. Si den Statüt autonomía ta mará na e posibilidad di intervenshón di parti de gobièrnu macamba, anto obviamente no por papia di autonomía. E término estado tambe solamente tá reservá pa un pais soberano. Papia di pais Còrçao tá un contradictio in terminis. Atribútonan di un pais tá hustamente su soberanía y defensa, relashonan exterior y nashonalidad aparte di otro asúntunan manera maneho di strañero. Y tur tá den man di Paisnan Abóu, según Statüt (Artículo 3).

Awor mas qu nunca no por papia di autonomía. Na promé lugá pa anecshón, BES ta bira teritorio macamba. Y e sobrá íslanan lo queda someté na un còntròl colonial racista mas profundo vía p.e. Comishón di Supervishón Financiero y presencia di Reichscommissar Kamp.

¿Con antó nós lo por disponé di nos matérianan prima estratégico, si nós ta colonia o teritorio macamba? ¿O minimalmente negoshá cu esún qu tá mas faborábel pa nós pa llega na nogoshi hustu y na repartishón hustu di beneficio? Den caso di macamba por conta qu lo cosechá solamente wiriwiri, manera sémper.

E proceso di profundisashón di colonisashón macamba qu a cuminsá abiertamente cu Declarashón Final, tábatin y tin como meta sigurá interés macamba, según e púntonan qu nós a formulá anteriormente. Acelerashón di e proceso tin di aber qu mas y mas ta saliendo na cla cua tá e motíbunan berdadero di nan ocupashón. E artículo den Volkskrant qu a inspirá na scirbi Islanan Inútil 4, tá demostrá paquico nós no tá inútil. Macamba quièr concretisá e proceso aquí mas lihé posíbel promé qu sali definitivamente for di e tapaqueshi macamba y nos resistencia llega e masa crítico qu lo impidí nán sigui cu e proceso aquí di profundisashón di colonisashón.

E pronto llegada di Reichscommissar Kamp tá directamente relashoná cu e ansha pa caba e proceso aquí lo mas pronto posíbel.

Papiamentu Bibu

___________________

[1] Venezuela su constitushón ta bisa den Título II, Capítulo I artículo 12: «Los yacimientos mineros y de hidrocarburos, cualquiera que sea su naturaleza, existentes en el territorio nacional, bajo el lecho del mar territorial, en la zona económica exclusiva y en la plataforma continental, pertenecen a la República, son bienes del dominio público y, por tanto, inalienables e imprescriptibles. Las costas marinas son bienes del dominio público.»

[2] Den su constitushón di 2008 Ecuador ta formul’é mesora den artículo 1 di e siguiente manera: «Los recursos naturales no renovables del territorio del Estado pertenecen a su patrimonio inalienable, irrenunciable e imprescriptible.»