Antilla como base militar di agreshón

Nós no ta cansa di ripitié. Y nós lo sigui ripitié.


Mientras tin tantu beheit tocante e básenan militar yanki na Colombia, e básenan militar makamba y yanki aqui y na Aruba tá di pelíguer inmediato y agudo. ¿Paquico? Claro méster argumenté, especialmente pa e incrédulonan entre nós.

E proceso di profundisashón di dominio colonial racista a través di Declarashón Final tá directamente relashoná cu militarisashón di Caribe y América Latino.

Tin un documento riba e página-web di Visiones Alternativas, Militarización Made in USA, qu ta duna un bon resumen di militarisashón di América Latino. Omishón notábel y stratégico tá e importancia di Antilla como base militar di agreshón makambo-yanki.

Méster mantené Antilla, na promé lugá como base económico y financiero y na di dos lugá como base militar. Antilla como base militar makambo-yanki ta reafirmá su importancia económico-financiero. Nós como base, como palanca ta duna acceso na un vasto teritorio inmensamente ricu. Un teritorio di posibilidadnan sin limite. El Dorado.

No tá esún o e otro. Tá un vishón total y totalitario di dominio, còntròl y explotashón cu diferente componente: económico, financiero, militar, mediático, electrónico, espacial. Tur componente tá interconectá.

¿Quico tá pasando geopolíticamente? Na nivel mundial mundu germano noroccidental makambo-yanki-anglosahón tá pèrdiendo mas y mas posishón stratégico y influencia. Caribe y América Latino tá nán último bastión. Sin nós, sin un còntròl total di Caribe y América Latino, e proceso di derumbe di imperio makambo-yanki lo acelerá mas aínda. Sin nós nán tá nada.

Si nos funshón militar tá pa haña América Latino atrobe bou di còntròl, còntròl di América Latino ta cuminsá na promé lugá na Venezuela, e país qu mas reserva di petroli y e país qu tá descubriendo mas y mas yacimentu di gas natural. Aparte di esey Venezuela ta poseé diferente fuente di awa dushi. Y asina por menshoná diferente otro recurso natural manera heru, bauxit, oro, uranio etc. etc.

E proceso di profundisashón di dominio colonial racista di Antilla, tin tur cos di aber cu e gran plan di dominio di e gran patria caribo-latinoamericano.

¿Quico e proceso di dominio y profundisashón colonial racista tin di aber cu geopolítica? Tur cos. Tur e básenan militar tin di aber cu còntròl y dominio. For di un base militar yanki na Honduras, Palmerola, a ehecutá e gòlpi di estado contra presidente Zelaya.

Colombia, e otro bastión yanki, ta un barí di polvorá. A pesar di tur e básenan militar yanki na Colombia, revolushón na Colombia tá cuestión di tempu. Colombia tá un bòm di tempu. Otro paisnan manera Ecuador a eliminá otro base yanki (Manta). Mayoría país latinoamericano ya no ta canta y balia na amèn makambo-yanki. América Latino y Caribe, poco-poco tá integrando. Tur integrashón ta bai contra interés di dominio y còntròl makambo-yanki.

Mantené Antilla pacificá, o sea controlá, dominá bou di Pax Neerlandica, e tapaqueshi makamba, ta crea pa makamba y yanki e lugá y e base mas stabil for di unda por operá indiscriminadamente contra nós.

Nos posishón singular, stabil, controlá y dominá colonialmente pa makamba, yanki su secuas y vasallo mas fiel (nós quièr mantené nivel y no cai den formulashón mas pisá), nos posishón di cercania pa cu Venezuela, ta haci di nós e base militar di agreshón pa excelencia. No laga ningún hende duda riba esey.


Papiamentu Bibu




E bitácora aquí tá abrí pa reacshón. Tur reacshón tá someté na moderashón y solamente lo sali publicá si e «bitacorístanan» ta haña qu ta trata di un reacshón constructivo (no necesariamente mester tá di acuerdo cu nós).