Recientemente riba e página-web di Rebelión a sali publicá un artículo cu e título El definitivo adiós al patio trasero. E artículo tá directamente relashoná cu e proceso di militarisashón di América Latino di parti di imperio mericano y su lacayo, su cachó más fiel: macamba.
Mundu político-militar anti-imperialista latinoamericano y caribe tá comprondiendo e mensahe germano (makambo-yanki) bon cla. E colonisashón financiero-económico-militar di Colombia, e gòlpi di estado na Honduras (di cua Obama ni siquiera tábata na altura), diferente otro base na teritorio caribo-latinoamericano (entre nán prominentemente ta figurá Còrçáo y Aruba cu e básenan militar makamba y yanki), reactivashón di e di cuáter flota imperial, y no laga nós balia rònd di e asuntu y papia papiamentu cla y bibu, tin como meta guera.
Ya algún aña pasá a tene ehercícionan militar na Antilla como antesala pa loque, si no logra conten’éle, lo bira guera na América Latino y Caribe. ¿Guera paquico? Guera pa còntròl di recurso den un mundu caminda día pa día recurso ta bira mas scars. Recúrsonan qu América Latino y Caribe aínda tin na abundancia manera gas (recientemente na península Paraguaná (estado Falcón), no mashá leu for di nós Venezuela a descubrí un enorme yacimiento di gas di alrededor di 10 trillón pía cúbico), y, mashá importante, awa. América Latino conocé un di e resérvanan de awa dushi mas grandi na mundu manera acuífero Guaraní. Y, más qu claro, hende someté (no sumiso) como recurso humano bou còntròl di compínchinan criollo (local) qu ta faborecé e makambo-yánkinan (manera tá sosodiendo na Colombia y aqui).
Mundu político-militar (comandante Chávez continuamente ta papia di cívico-militar) latinoamericano tá consciente di e inminente pelíguer qu e germánonan tá representando. No sin motibu pues presidente Inacio Lula da Silva tá aumentando su poderío militar, y no cu material yanki (pasobra ora cos lo bira parènpènpèn obviamente Merca lo boicoteá mantenshón di material militar cumprá cerca nán, manera nán a haci cu Venezuela), sino cu material francés cu transferencia di tecnología haciendo e compleho militar-industrial brasilero auto-suficiente.
Además, sumamente importante, Lula a laga sa qu Brasil tin e posibilidad di fabricá arma nuclear, un mensahe no-gratuito di parti di Lula. Loque Lula tá bisando realmente: den secreto nós tá trahando ariba caba o, tal bes, ya nós tá den poseshón di arma nuclear. Esaqui tá e único cos qu e makambo-yánkinan ta comprondé y ta respetá y lo tene nán na distancia.
E mesún código nós por destilá for di e biahe di comandante Chávez. Aparte qu e biahe tábatin como meta quibra na filingrana e cerco mediático y progresivo criminalisashón di Chávez y revolushón bolivariano, e meta tábata principalmente estratégico-militar.E biahe, especialmente pa Rusia, pa adquirí arma di defensa den forma di cohétenan Smerch y tanqui di guera T-72 tá pa agilisá, acelerá fortificashón di defensa venezolano. E cohétenan Smerch ta alcansá Íslanan ABC fácilmente. Tambe Chávez a menshoná desarollo di energía nuclear den cooperashón cu Rusia. En mensahe tá idéntico na esún di Lula. Nós ta bai desarollá arma nuclear pasobra tá e único arma disuasorio, e único lenguahe qu e bárbaronan aquí ta comprondé.
Awemainta ta sali den Algemeen Dagblad qu Merca tá preocupá pa e reciente adquisishón di arma di parti di Venezuela. E compleho germano makambo-yanki tá preocupá qu e adquisishón aquí lo resultá den un carera armamentista. Esaqui tá loque e escritor uruguayo Eduardo Galeano a llama «el mundo al revés»; mundu contrali. Esnán qu ya pa dos mil aña tá terorisando y dominando mundu, di nos caso awor cuátershen aña, qu tin riba nán «blachi di bida», teror, genocidio, sclabitud, colonisashón, explotashón, aínda te día di awe, ta acusá otro di loque nán a cometé. Esaqui ta sali for di boca di e compleho imperial militar makambo-yanki qu tin mas qu 800 base militar rònd mundu na 40 país. Definitivamente mundu contrali. Esaqui tá Inculpatio.
Manera nós a bisa, e noticia qu Venezuela ta bai explorá «energía nuclear» tampoco tá gratuito. Tá un mensahe cla. E único mensahe qu e germánonan makambo-yanki ta comprondé. E crisis entre Merca y Unión Soviético na 1962 pa e misilnan nuclear ruso tábata pa protehá y blinda Cuba contra di un ataque makambo-yanki devastador.
Cu expanshón militar makambo-yanki na Colombia, y e básenan militar makambo-yanki na Antilla, nán quièr changa Venezuela y destruí revolushón bolivariano venezolano, cubano y pa extenshón revertí cámbionan na Ecuador, Bolivia, Nicaragua, Guatemala, El Salvador etc. etc. Es decir, destrucshón di e coriéntenan soberano revolucionario anti-imperialista.
Nós tá ya caba teritorio di guera, y nós lo tá directamente den liña di fuego ora e tenshonan escalá den direcshón di guera. E desaróllonan aquí tá serio. Nos superbibencia tá na pelíguer.
Aparte di mil y un argumento pa bira independiente, un argumento práctico pa bira independiente tá pa pone un fin na presencia di e básenan militar makambo-yanki y asina evitá qu nós ta haña nós involucrá den un guera qu nós no a pidi p’é y qu finalmente tá un guera contra nós tambe.
E prospecto di guera na teritorio caribo-latinoamericano contra e moveméntunan revolucionario soberano anti-imperialista, tá un guera contra nos lucha pa libertad tambe.
Papiamentu Bibu
E bitácora aquí tá abrí pa reacshón. Tur reacshón tá someté na moderashón y solamente lo sali publicá si e «bitacorístanan» ta haña qu ta trata di un reacshón constructivo (no necesariamente mester tá di acuerdo cu nós).
No hay comentarios:
Publicar un comentario