Un interesante programa diamars mainta cu sr. Don Martina na Radio Direct 107.1 FM. Mas lamentábel tá e forma qu miníster Leeflang ta reacshoná. Nós ta referí especialmente caminda Leeflang ta reprochá Don Martina qu e tábata consehero di gobièrnu. Por lo tanto, ¿paquico awor Martina ta criticá? E otro punto pernicioso di Leeflang tá su referencia na Haití. No tá promé bes.
Algún punto:
1. Tur hende tin e derecho y e facultad di reconocé un eror y coregí su pensamentu o decishón. ¿Cuantu caso no tin di hende qu, na moda di bisa, ta arepentí riba nan cama di morto? Por lo tanto Leeflang ta ninga Martina e derecho di llega na e conclushón qu manera cos tá, no tá corecto y ta ninga Martina e derecho di cambia di opinión. ¡Insólito!
2. Responsabilidad na promé y último lugá no tá di consehero, Don Marina den e caso aquí, sino di esún (o esunan) qu tá den posishón di tuma decishón, den e caso aquí e partídonan político den gobièrnu di cua Leeflang tambe ta forma parti. Leeflang no méster tira falta riba consehero. E único responsábelnan tá esnán den gobièrnu y Leeflang tá un di nán.
Pa loque ta trata don Martina: Como hòmber qu conocé gobièrnu totalmente, como «iniciado», tá di aplaudí qu después di tantu aña di experiencia di promé man, e ta llega na reconsiderashón di su quibucashón. Su honestidad tá laudábel.
3. Leeflang a referí na Haití cu e siguiente palábranan (nós ta cita mas o menos): Haití tá e promé país pretu qu a logra independencia den nos hemisferio. Haití tá e último país den desarollo. ¿Tá quico Leeflang quièr men tal bes inconscientemente? ¿Qu tá Haiti su condishón di país pretu qu tin e caminda e tá? Y qu p’esey por ehemplo nós mes no por y necesariamente nós méster di macamba pa sobrebibí? Di dos asuntu. ¿Paquico Leeflang permanentemente méster falsificá historia ora e referí na Haití? Ora e referí na Haití, como excepshón, e méster referí na tur otro nashón den Caribe caminda sí cos tá bai bon. Y cada unu tá país independiente. Nós aínda tá colonia. Además, ora e menshoná Haití, e méster menshoná paquico Haití tá den loque e tá awor na 2009. E tin qu menshoná qu Merca (y Paisnan Abóu tá aliado incondishonal di Merca) a sea invadí Haití o a mete directamente cu asúntunan haitiano interno. Tá Merca (y Paisnan Abóu tá aliado incondishonal di Merca) qu a pone Duvalier y su asesínonan (Tonton Macoutes) na poder y terorisá su pueblo di 1957-1986, casi trinta aña. Y asina nos por sigui bai cu metementu den asúntunan interno den caso di Aristide, te cu e día di awe. Asina tambe te cu e día di awe Paisnan Abóu ta mete den nos asúntunan. P’esey nós tá stancá y pará caminda nós tá.
¿Paquico e ataque descontrolá aquí di Leeflang? Cu e ataque aquí Leeflang tá tratando di tapa un gran bèrdad: Mayoría di isla-nashón di nos grandura a sobrebibí nan independencia y tá progresando.
Por lo tanto, haci uzo di Haití como ehemplo tá chantahe barata.
Papiamentu Bibu
No hay comentarios:
Publicar un comentario