Bacoba pa cue Macacu: un acto coruptivo di soborno

Nós a tuma nota di dos noticia den corant di e último díanan.

E promé noticia tá qu Bijleveld awor tá papiando di tuma 100% di e supuesto debe. E otro noticia tá qu un delegashón grandi di Fundashon Kas Popular (FKP) a biaha pa Paisnan Abóu.

¿Con e dos notícianan aquí tá conectá cu otro? Además, ¿quico nán tin di aber cu resultado di referéndum?

Na promé lugá, manera nós a argumentá, resultado di referéndum tá e prefecto cònòpi gordiano. Resultado di referéndum tá un derota pa e colonisadó y opresor racista macamba. Con qu bó mir’é. E colonisadó tin awor dos opshón:

1. Intervenshón militar. Tá bon còrda qu PVV a vociferá e opshón aquí una bes e tin poder. Intervenshón militar sémper tá un opshón. Na Indonesia bou di liderato di e supuesto progresivo Drees a intervení militarmente.

2. Soborno

Na e momento aquí intervenshón militar no tá al caso aínda. Pero soborno sí. Tá naturalesa di e sistema: E structura colonial di Statüt tá inherente y fundamentalmente y moralmente corupto y coruptivo, pasobra e tá basá riba mentira y fraude.

E supuesto paso di tuma responsabilidad di 100% tá un acto coruptivo di soborno, e tá e clásico bacoba pa cue macacu. Tá un paso mas pa trata di sigurá e operashón di intensificashón y profundisashón di dominio colonial racista parasitario macamba.

Ma manipulativo qu macamba tá, e rabu di 1500 pa 2000 millón florín e ta convertí den loque Bijleveld a llama un «direct opeisbare lening». Por lo tanto e cabulla di horca ta queda y por hala pèrt’é calque momento qu nós no ta comportá manera macamba quièr.

E biahe di FKP tá directamente relashoná cu esaqui. E político responsábel pa FKP a primintí basta cas. Si nós no tá herá 10.000. Poco tempu pasá a menshoná e cantidad di 5000. 10.000 o 5.000, tur dos cifra ta representá basta cas den nos contexto geográfico.

Construcshón di cas tá un condishón pa apoyo frentista na Declarashón Final. Cu cas Frente por demostrá su electorado qu su traishón a bal algu: construcshón di cas. ¿Y unda mas e supuesto bienestar y progreso primintí por tá ta visíbel y palpábel? Construcshón di cas.

Por lo tanto, tambe e paso aquí ta un acto corupto y coruptivo. E tá un forma di soborno. Tá un acto di cumpra boluntad político na fabor di Declarashón Final.

Por lo tanto logra, awor sí, haña cèn di macamba pa por construí cas di pueblo tá un acto di soborno den cuadro di táctica macamba pa por consolidá e meta di profundisashón y intensificashón di dominio colonial racista.

Aínda no a contestá e pregunta esencial. Tur loque a scirbi anteriormente tá relevante. ¿Ma cua tá su esencia? Es decir, ¿paquico tá pasando loque tá pasando?

Esencia di enter e operashón tá basá riba dinámica di colonialismo qu ta adaptá su sistema según necesidad.

E actual operashón tá basá riba e miedu qu macamba tin qu calque momento enter e asuntu ta resultá den un grito, un deseo pa independencia.

E proceso di consolidashón , profundisashón y intensificashón tá pa crea un situashón, for di macamba su óptica, qu ta dificultá e proceso di independencia.

Anecshón di BES, como promé paso, anecshón di st. Martin como di dos paso (ya macamba tá declarando qu St. Martin no ta cla pa un status autónomo), y posteriormente anecshón di Aruba (a cuminsá prepará tereno cu un supuesto investigashón contra corupshón), y finalmente anecshón di Còrçáo, lo haci independencia muchu mas complicá. Independencia for di un condishón anexá tá extremadamente complicá.

Papiamentu Bibu