Un Victoria Histórico

Pero aqui ta cuminsá un historia nobo. E historia di e renobashón pocopoco di un hòmber, su regenerashón progresivo, di su paso gradual di un bida pa otro, di su ascenshón na un realidad nobo desconocí p’e.

FEDOR DOSTOIEVSKI
For di Crimen y Castigu

31 di yanüari 1962 un organisashón llama Organisashón di Estádonan Americano, OEA, riba preshón mericano tá dicidí expulsá Cuba for di su Organisashón. For di e momento ey mas qu nunca tábata obvio qu OEA a bira un instrumento di manipulashón y dominio colonial di parti di Merca y su vasállonan inglés y macamba. Tantu qu a cuminsá llama OEA «ministerio de colonias».

OEA su política no tábata nada mas qu un consecuencia imperial y pernicioso mas di un doctrina lansá na 1823. En consecuencia di e doctrina aquí, Monroe a declará qu América tá pa americánonan. Monroe su doctrina tábata na su turno consecuencia di mericano su destino manifiesto. Realmente Monroe tábata quièr men «América pa norteamericánonan». Nós, América Latino y Caribe a bira mericano su «traspatio», su «curá patrás».

Loque destino manifiesto, doctrina di Monroe, Roosevelt su corelario y tur otro política di explotashón, dominio, colonialismo y neocolonialismo a nificá, entre otro, Eduardo Galeano a documentá di forma inimitábel. Cu rasón Hugo Chávez a regalá Barack Husein Obama e buqui di Galeano, pa asina e «resucitá» y comprondé loque e germánonan qu ta dominá mundu entre otro a haci y aínda tá haciendo na América Latino.

Pues, recientemente a convocá un asamblea general di OEA qu tábatin como meta principal discutí riba e resolushón infame allá, resolushón di 1962, qu a sancshoná Cuba, y, nós ta cita presidente Manuel Zelaya di Honduras, «pa a proclamá idéanan y princípionan socialista». Zelaya ta sigui: «Nós no por bai for di e asamblea aquí sin drecha e eror ey y e infamia ey, basá riba un resolushón di OEA qu ya tin mas di cuáter década. Riba e pueblo rumán aquí di Cuba a mantené di parti di un di e democrácianan mas fuerte di mundu, Merca, un bloqueo inhustu y inútil. Precisamente pasobra no a logra ningún propósito, pero sí a a demostrá qu ey na poco kilométer for di nos pais na un isla chiquitu, tin un pueblo dispuesto na resistí y haci sacrificio pa su independencia y soberanía.» Finalmente Zelaya ta concluí: «Tá haci di nós cómplice di un resolushón di 62 di expulsá un estado for di OEA simplemente pasobra e tin otro idea, otro pensamentu y otro principio di un diferente democracia.»

Na caminda y durante e asamblea aquí, Merca a trata di condishoná Cuba su reingreso, exigiendo «cambio» riba tereno di democracia y derecho humano.

E compleho mafioso imperial genocida qu mas humano a mata qu calque otro imperio hamás, ta papia di derecho humano.

Finalmente pa aclamashón general e revocá e decishón infame allá di 1962 y a derogá e resolushón. Y cu esaqui, manera e corant digital cubano Granma a formul’é, historia a absolvé Fidel y pueblo cubano.

Tá un promé paso. E siguiente paso tá revocashón mericano di e bloqueo infame y genocida contra pueblo cubano, qu tambe, aunque no a logra haña pueblo cubano na rudilla, sí a causa mashá daño na economía cubano, según cálculo 90.000.000.000 dollar mericano for di día qu a instituí e bloqueo. Un bloqueo qu además tá violá soberanía di tur pais na mundu, e principio di soberano di haci nogoshi qu esún qu bó ta haña qu tá bon. Otro bia mas tocante e asuntu aquí.

E revocashón tá un derota contundente pa imperialismo germano (mericano-macamba-ingles). Falta awor e di dos parti, e bloqueo.

Mañán nós lo comentá Cuba su reacshón y decishón riba e revocashón.

Papiamentu Bibu