Un Victoria Pa Nò

Nós a laga un poco tempu pasa y asina pèrmití huma di e batalla disipá pa duna nos comentario riba e resultado di referéndum.

E título ta bisa tur cos. Ora de Jong Elhage a pronunciá su promé palábranan, el a papia di «acercamentu». Cu e palabra aquí el a admití su derota.

E referéndum a funshoná manera un bumerán.

Considerando e intimidashón di parti di macamba, tantu gobièrnu como parlamento, e diferente biáhenan di «intimidashón colonial», manera un scirbidó di remetido den Amigoe a formul’é, tur e promésanan qu aínda no a cumpli cun’é, e basilón di supuestamente cuminsá cu cancelá e supuesto debe nashonal, di cua solamente – si realmente ta sigui cun’é – ta cancelá un parti, e campaña di (des)informashón tantu di parti di gobièrnu como sector privá, e fóndonan for di sector privá (algún millón) y propaganda di parti di gobièrnu, e tremendo wòrst qu a cologá pa gaña hende, manipulashón mediático manera e supuesto bentaha di Sí di 24% (encuesta macamba) etc. etc. etc., anto e «empate» di 48%/52% no tá «ganá tá ganá». Al contrario 48%/52% tá un derota, y un derota contundente pa Sí. Sí no por sigui ignorá 38.363 Nò.

Sí pa tá convincente méster a logra un «mayoría significativo» di minimalmente 60% y mas. Preferiblemente mas pa por a tapa Nò su boca. Awor Sí tá den e posishón mashá incómodo di tin qu tene cuenta cu minoría «significativo» di 38.363 hende.

38.363 hende qu a bisa Nò na profundisashón y intensificashón di dominio colonial racista macamba. Loque e 38.363-Nò-nan aquí no sa aínda qu nán a acelerá e proceso di independencia, a pesar qu nán a vota pa mantenshón di un status quo colonial.

Y loque e 41.398-Sí-nan tampoco sa qu nán tambe a vota pa acelerá e proceso di independencia pasobra aworó lo resultá qu lo no por cumpli qu tur e promésanan qu Sí a haci, y qu un biá mas, manera tábata e caso ya durante cuátershen aña y manera a pasa cu Pourier y Ijs, macamba lo bolbe traishoná e pueblo aquí, y lo resultá qu nada di e promésanan a queda cumplí y qu nada di e progreso y e bienestar qu a primintí a queda lográ.

E perfecto cònòpi gordiano. Un cònòpi qu solamente independencia por saca for di otro.

Sí, Referéndum a funshoná manera un bumerán.

Y nós di Papiamentu Bibu lo sigui traha queta bai, nós lo sigui scirbi, nós lo sigui papia, nós lo sigui concientisá, y cu pasenshi di inján, honrando nos antepasádonan, nós lo warda e pueblo aquí lanta para y bisa: «¡Awor Sí ta basta!»

Papiamentu Bibu