Gaza

Esún qu criticá e estadio sionista Israel pa su invashón y ataque brutal na Gaza, ta queda condená como apoyadó di Hamás, qu según Israel, y su protector Merca den combinashón cu inglés y macamba, tá un organisashón terorista.

Ora ta atacá interés di e compleho imperial y su prostituta Israel, qu tá su interés directo como patacabra pa destabilisá Medio Oriente y asina aplicá e política di sémper Divide et Impera, tá tilda esún qu ta busca defensa contra teror di estado di tá terorista.

Día presidente Jimmy Carter, no menos imperial qu tur e otro presidéntenan qu Merca a conocé, a bisa qu méster bin pas y no apartheid, sionístanan a ataqu’é formalmente y a considerá su expreshón como traishón. Pasobra no tá aceptábel traishoná Israel.

Política macamba no tá diferente. Macamba ta forma parti di e compleho protector qu ta uza Israel como prostituta pa sembra discordia y dominá Medio Oriente. Macamba su política pa cu Israel tá «protecshón» y «integridad» di estado israelí na promé lugá. Ni masque Israel tá cometiendo un masacre na Gaza. Ni masque pueblo palestino tá sufriendo den e bantustán qu llama Gaza: un campo di concentrashón.

Presidente Chávez di República Bolivariano di Venezuela ayera a ordená expulshón di e embahador israelí como acto di condena y protesta contra e matanza na Gaza. ¿Y quico Israel a laga sa? Chávez tá apoyá Hamás, por lo tanto Chávez ta apoyá terorismo. Tá e mesún historia di e genocida Bush ora después qu a tumba a dos edifícionan na Nueva York a bisa: «O bó tá cu nós, o bó ta contra nós.» Entre tanto nós ta cincu aña mas leu y mas di 1.000.000 iraquí asesiná pa e política bárbaro di Bush, Blair y Balkenende. ¿Y quen, cu un crenchi di consenshi, quièr tá cu nán? ¿Quen di nós den e supuesto reino macamba aquí quièr queda asociá cu e criminal di guera Balkenende, partícipe y cómplice di e asesinato di mas di 1.000.000 iraquí? Por lo tanto nós ta aplaudí presidente Chávez su decishón.

Tragedia di enter e historia aquí tá, qu Israel ta quere qu su burdúgunan mericano, inglés y macamba tá su aliádonan. Nada di esey tá bèrdad.

Mas trágico aínda tá qu un pueblo qu a sufrí asina tantu a través di mas di 2000 mil aña di biba den diáspora, por tá asina cruel y inclemente pa cu su rumán semita. Al fin y al cabo tur dos ta bin for di e mesún troncón. Rumán di otro nán tá.

No ta existí ningún clase di argumento bálido, sea histórico o bíblico, qu ta hustificá existencia di e estado Israel. Sin Merca y Inglatera Israel nunca por a existí. Y su existencia awor, na 2009, ta dependé di su burdúgunan, e germánonan cu Hitler como instrumento qu tábatin e plan macabro di caba cu un «rasa».

A hòrta teritorio palestino for di un pueblo qu sí históricamente tur tempu a biba caminda loque tá awor Israel. A pesar di e tragedia qu a cuminsá pa pueblo palestino for di colonisashón británico y después e momentu qu e promé sionístanan a aparecé, pocopoco mundu a cuminsá aceptá presencia di un estado qu llama Israel.

Si a hòrta e palestínonan nan cas, anto siquiera Israel, en bes di aplicá e mesún política qu casi a caba cu hudiu, por compartí e cas cu su rumán.

Papiamentu Bibu