Nós tábata testigu (visual) di un elecshón qu no mester tábata mas importante ni menos importante qu calque otro elecshón na mundu. Lamentablemente nós cada bes atrobe ta haña nos confrontá qu e realidad amargo di bida mericano: tur cos tá reducíbel na e imagen qu médionan di comunicashón ta presentá. Y nán ta present’é manera un avalancha qu no ta diferenciá mas mashá for di e técnicanan di propaganda di e máquina nazi bou di guía di Joseph Goebbels. Mientras mas bo ta ripití un mentira, mas e ta bira un bèrdad. Nós mes sa quico esey ta nificá: Nos «bèrdad» qu nós no por, qu nós no ta sirbi, tá e mentira qu macamba ta ripitiendo for di tempu di e cámponan di concentrashón di Quenepa y Santa Cruz.
Un debate fundamental na Merca no ta existí. Al contrario, ta regalá 700 billón dòlar na companíanan corupto. E lenguahe di guera di McCain y Obama conocé diferéncianan mínimo. Es mas, tá Obama su intenshón intensificá e guera na Afganistán y Paquistán.
Un nashón cu un producto bruto nashonal di 10.000 billón di dòler, brigando dos guera simultáneamente, un presupuesto militar di 700.000 millón dòler qu ta tuma 50% di presupuesto anual, cu mas di 700 base militar na 130 pais rònd mundu, qu for di día di su existencia tá e factor destabilisadó principal na mundu cu su incontábel intervenshonan y guéranan, cu alrededor di 45.000.000 pa 50.000.000 mericano qu no tin seguro médico, y qu den senado no por llega na un acuerdo pa algún dòler pa por sigurá e múchanan mas póber di nan sociedad, no merecé nos rèspèt ni nos admirashón.
Esaqui no por tá e «American dream» qu Obama frecuentemente ta papia di je.
Un nashón asina no por tá guía di mundu, ni ehemplo di ni pa mundu.
Un nashón asina no tin derecho di criticá otro pais, caminda e mes tá deficiente den e deréchonan humano mas básico pa su ciudadanía.
E pais mas ricu na mundu conocé pobresa y no poco. Sin embargo nan gástunan militar ta cubri casi 50% di gastu militar mundial y 50% di nan presupuesto nashonal. Nan supuesto competencia, Rusia y China huntu, tin un gastu militar di apenas 13% di e totalidad mundial. ¿Y quico Merca ta bisa awor qu Rusia ta mas asertivo? Rusia tá provocando un guera friu nobo.
Mientras tantu pa cada secshón na mundu nán tin un centro di comando militar manera Centcom, Africom, Southcom. A crea Africom recientemente como centro di operashón di explotashón y saqueo di, un bia mas, África. Nós ta cai bou di Southcom. Y recientemente a resucitá e di Cuáter Flota pa Caribe y Suramérica como e arma militar contra esnán qu no tá di acuerdo cu nan política imperial y no ta comportá na nan amèn.
Un nashón, como cabés di e compleho mafioso huntu cu Inglatera y Paisnan Abóu, qu permanentemente ta menasá y terorisá mundu, no tin derecho di hisa dede contra otro pais y papia di democracia y derecho humano.
Un pais qu a ehecutá mas qu un genocidio den su trayectoria, cuminsando cu e genocidio di inján, néguer, pa después sigui cu haponés (Hiroshima y Nagasaki), coreano, vietnamés y awor iraquí (mas qu un millón den e guera di yu Bush), no tin e derecho di papia di derecho humano. Y huntu cu nán macamba, cómplice den e crimen aquí contra humanidad, pasobra macamba ta participá activamente. Pa e participashón aquí a haña nan premio cu e conseshón di cuáter billón cu Shell a haña na Iraq.
Diferente be tantu McCain como Obama a menshoná qu méster restablecé Merca su credibilidad y Merca su liderazgo na mundu. ¿Cua credibilidad? ¿Ma tá quen a pidi pa nán liderá mundu? ¿Y liderá den quico?
Mundu occidental, y en particular mundu germano, su bienestar y abundancia tá financiá pa nós desgracia, explotashón, sodó y sánguer. Cu nos miseria nán ta paga nan abundancia.
Awendía ya Merca no tin e libertad ey mas manera antes. Awor na nivel mundial tin mas actor manera India, China y Rusia. Latinoamérica tá acertando por fin su real soberanía y tá reclamando su fuéntenan estratégico pa por cumpli cu e necesidadnan básico di su pueblo. Na Eurasia especialmente riba tereno energético Rusia a pone y tá poniendo nán haque mate.
Pues, mientras Merca tá expandiendo na nivel militar, na nivel económico geopolítico su influencia tá birando día pa día menos. Pero su política imperial no tá na nivel di e influencia ey qu a baha enormemente. Al contrario, ta busca mas base militar na mundu.
Esaqui tá e Merca qu Obama tá heredando.
Merca tá un pais den bancarota sin e wesu di lomba industrial pa realmente recuperá. No tá un secreto. ¿Con Obama tin pensá di financiá tur su planan social?
Eligí un mericano pretu na un Merca profundamente racista, caminda apenas cuarenta aña pasá Martin Luther King tábata na comienso di un lucha pa igualdad, caminda apenas cuarenta aña pasá segregashón racial na tur nivel di sociedad tábata regla y ley, caminda hende pretu no por a vota, eligí un mericano pretu qu además ta carga e nòmber inusual di Barack Husein Obama tá histórico den tur sentido di palabra.
Pa cu nós, resto di mundu, elecshón di Obama lo no nificá un gran cambio. Barack Husein Obama lo tá na cabés di e mesún sistema germano di hiba un política imperial genocida. Awor, cu un hòmber pretu como capa, lo no por bisa mas qu e política imperial genocida tá dominio y derecho exclusivo di «rasa» germano. Por lo tanto, den e sentido aquí Barack Husein Obama, y igualmente calque otro persona no germano, a llega muchu temprán na e puesto ey. Imperio germano cu Merca na cabés aínda no tá suficientemente na rudilla. Na rudilla ti tal manera qu un Barack Husein Obama lo lanta para entre e sobranan di un imperio germano y realmente lanta un pais di nobo, librá y na pas cu su pasado, digno di tá entre tur otro pais.
Papiamentu Bibu
No hay comentarios:
Publicar un comentario