Resolushón 1514 Nashonan Uní

Papiamentu Bibu a pasa 10.000 hit di su Bitácora. M'a e númber aquí no tá asina importante. Mas importante tá e númber di un resolushón di Nashonan Uní. E resolushon aquí tá e manual di independencia.

Den derecho tantu pasividad como actividad conduciendo na un crimen, delito o situashón inaceptábel tá castigábel. Asina p.e. tá mes castigábel un mama o un tata qu no ta duna su yu cuminda y un mama o un tata qu ta maltratá su yu.

Esún qu lesa e resolushón aquí ta realis'é qu tantu di nos parti, pa inercia, pasividad y inactividad inducí pa miedu, como di parti di macamba pa actividad den forma di sclabitud, terorismo, intimidashón, opreshon, colonialismo y dominashón tin culpabilidad. Culpabilidad pa cu e echo qu aínda nós no tá independiente y soberano.

Nos miedu pa independencia tin su origen den sclabitud, terorismo, intimidashón, opreshon, colonialismo y dominashón macamba bayendo pa cuater siglo.

Sin embargo, y p'esey nós a traduci'é y ta publiqué awor, tá necesario qu cada un di nós ta tuma nota y haci su mensahe y su nificashón parti di nós. E documento aquí ta papia idioma cla y bibu.

Cu e texto aquí nós ta duna e promé contesta na tur esnán qu ta oponé o por lo pronto ta oponé independencia cu mil un traba y pretexto. E tá tambe un contesta na esnán, manera nós a formulá den e artículo Colonia o Colonia Plus, qu ta propagá qu aínda nós no tá cla pa independencia. Artículo 3 di Resolushón 1514 tá duna e contesta.

Cu e texto tan importante aquí, nós ta celebrá e 10.000 hitnan riba e bitácora di Papiamentu Bibu.



Declarashón riba conceshón di independencia na paisnan y puéblonan colonial

Resolushón 1514 (XV) di Asamblea General, 14 di decèmber 1960

Teniendo presente qu puéblonan di mundu a proclamá den Carta di Nashonan Uní qu nán tá resuelto na reafirmá fe den deréchonan fundamental di hende, den dignidad y balor di persona humano, den igualdad di deréchonan di hòmber y muhé y di nashón grandi cu chiquitu, y na promové progreso social y na elevá nivel di bida dénter di un concepto mas amplio di libertad,

Consciente di e necesidad di crea condishonan di stabilidad y bienestar y relashonan pacifico y amistoso basá riba rèspèt di e princípionan di igualdad di derecho y di e líber determinashón di tur pueblo, y di sigurá rèspèt universal di deréchonan humano y libertadnan fundamental pa tur sin haci distinshón pa cu rasa, sexo, idioma o religión, y efectividad di tal deréchonan y libertadnan,

Reconociendo e deseo pashoná di libertad den tur pueblo dependiente y e papel decisivo di dicho puéblonan den logro di nan independencia,

Consciente de creciente conflíctonan qu ta resultá di e echo qu ta ninga o impidí libertad di e puéblonan ey, loque ta constituí un grave menasa pa pas mundial,

Considerando e importante papel qu ta corespondé Nashonan Uní como medio pa asistí e movementu di independencia na teritórionan fideicomiso y teritórionan no autónomo,

Reconociendo qu puéblonan di mundu ta deseá ardientemente fin di colonialismo den tur su manifestashonan,

Convencí qu continuashón di colonialismo ta impidí desarollo di cooperashón social, cultural y económico di e puéblonan dependiente y ta militá contra e ideal di pas universal di Nashonan Uní,

Afirmando qu puéblonan por, pa nan propio fin, disponé libremente di nan riquésanan y recúrsonan natural sin perhuicio di e obligashonan resultante di cooperashón económico internashonal, basá riba principio di probecho mutuo, y di derecho internashonal,

Creyendo qu e proceso di liberashón tá iresistíbel y ireversíbel y qu, a fin di evitá crísisnan grave, tá preciso pone fin na colonialismo y na tur práctica di segregashón y discriminashón qu ta compañ’é,

Celebrando qu den e último áñanan mashá teritorio dependiente a alcansá libertad y independencia y reconociendo e tendéncianan cada bes mas poderoso pa cu libertad qu ta manifestá nán na teritórionan qu aínda no a obtené independencia,

Convencí qu tur pueblo tin un derecho inalienábel na libertad absoluto, na ehercicio di nan soberanía y na integridad di nan teritorio nashonal,

Ta proclamá solemnemente e necesidad di pone fin rápido y incondicionalmente na colonialismo den tur su fórmanan y manifestashonan;

Y cu e meta aquí ta declará

1. Sumishón di puéblonan na subyugashón, dominashón y explotashón strañero ta constituí un denegashón di deréchonan humano fundamental, tá contrario na Carta di Nashonan Uní y tá comprometé e causa di pas y di cooperashón mundial.

2. Tur pueblo tin e derecho líber di autodeterminashón: en virtud di e derecho aquí, ta determiná libremente nan condishón político y ta persiguí libremente nan desarollo económico, social y cultural.

3. E falta di preparashón den orden político, económico, social o educativo no por sirbi nunca como pretexto para retrasá independencia.

4. A fin qu puéblonan dependiente por ehercé pacífica y libremente nan derecho na independencia completo, méster para tur acshón armá o tur medida represivo di calque índole dirigí contra nán, y méster respetá integridad di nan teritorio nashonal.

5. Mester tuma inmediatamente tur paso, na teritórionan fideicomiso y no autónomo y na tur demás teritorio qu aínda no a logra nan independencia, pa traspasá tur poder pa e puéblonan di e teritórionan ey, sin condishón ni reserva, den conformidad cu nan boluntad y deséonan libremente expresá, y sin distinshón di rasa, credo ni coló, pa permití nán goza di un libertad y un independencia absoluto.

6. Tur intento qu tin como meta obstrucshón total o parcial di unidad nashonal y integridad teritorial di un país tá incompatíbel cu e propósitonan y princípionan di Carta di Nashonan Uní.

7. Tur estado méster observá fiel y estrictamente e disposishonan di Carta di Nashonan Uní, di Declarashón Universal di Deréchonan Humano y di e presente Declarashón riba base di igualdad, di no intervenshón den asúntunan interno di demás estado y rèspèt pa deréchonan soberano di tur pueblo y di nan integridad nashonal.


Papiamentu Bibu