Rumbo Fiho

¿Con mantené rumbo fiho den un mundu di mentira, falsificashón di historia y complicidad?

E pregunta aquí a surgi después di e artículo Un Revelashón.

Ora un di nós ta cai pa calque acto «humano», ¿con fiha nos posishón?

Y qu «nós», nós quièr men realmente un di «nós». O sea no un alemán, no un chinés, ni siquiera un makamba, sino un di nos mes héndenan.

Tantu cos ta pasa aqui qu nos promé reacshón, generalmente, tá: Laga makamba bin pone òrdu o «nós mes no por», nos di dos himno nashonal y De Jongh-Elhage su lema personal.

¿Con compará loque ta pasa aqui cu cásonan di fraude y corupshón makamba? Den e último caso nós tá papiando di 900.000.000.000 euro qu ta equibal na 2.200.000.000.000 florín antillano. Cèn qu ta laba vía nos teritorio como un acto di evashón fiscal. Un caso so di labamentu di placa qu tá conectá cu e caso «BTW carrousel fraude», den cua asta, sí, asta e e hefe di impuesto makamba mes, director general Jenny Thunissen tá metí. Thunissen tá sintá aínda riba su stul.

Compará e caso aquí so cu nos supuesto debe nashonal di 3 pa 5 billón florín antillano.

¿Quico esaqui ta nificá? E 2.200.000.000.000 florín antillano ey tá jis un fracshón di realidad. Un fracshón chiquiiiitu di realidad. Un realidad qu makamba tin completamente den man.

Còrda bon. Ta trata di jis un fracshón di realidad di e transacshonan qu ta core vía nos teritorio.

Nós a menshoná complicidad. ¿E noticia aquí a sali den margen den un Algemeen Dagblad di simán pasá. ¿Unda e sobrá corantnan a queda? ¿No tá un noticia di envergadura enorme?

Ahán, otro caso remarcábel di prostitushón di idioma: ¿Paquico makamba ta papia di un caso di millones, ora ta trata di un caso di billones? ¿Paquico por ehèmpel makamba ta llama nan presupuesto anual «Miljoenennota» ora ta trata di billones?

Trece e noticia aquí den relashón cu un artículo qu a sali tambe e simán aquí y qu ta referí na Paisnan Abóu como paradéis fiscal.

E intenshón di FIOD di yag riba e 2.200.000.000.000 florín no tá pasobra makamba, corupto pa excelencia, tá contra, sino pasobra nán quièr e placa aquí alla mes pa por fiscalisé y saca probecho alla como paradéis fiscal.

P'esey nós ta bolbe ripití nos plegaria awe.

Compatriótanan, a llega e ora di cuminsá registrá, documentá loque nós ta nificá pa makamba. Compatriótanan economista, tá boso deber sagrado cuminsá cu e tarea aquí.

Ora mañán nós tá asina leu qu, porfín, nós ta sinta na mesa cu makamba pa papia tocante transferencia di nos soberanía secuestrá y duna nós nos llabi di nos cas, tambe méster papia como conditio sindi indemnisashón pa cuátershen aña di ocupashón, colonisashón, sclabitud, explotashón, genocidio, teror, intimidashón. Méster formulá un demanda. Y e demanda su base, su punto di salida tá loque makamba a gana cu nós a través di cuátershen aña te cu e último día di nan ocupashón colonial.

Na final nós por haci nós e pregunta e ora ey: ¿Ta quen a costa quen cuantu? Un pregunta qu tá na moda cerca makamba. Tur loque nós supuestamente lo por a costa makamba y tur loque makamba debe nós, na final di cuenta a crea pa makamba un debe qu hamás nán lo por paga. Y tanten no llega na e momento ey, e debe qu makamba tin cu nós ta sigui aumentá cu interés compuesto.

¡Compatriótanan, man na obra!

Papiamentu Bibu



E bitácora aquí tá abrí pa reacshón. Tur reacshón tá someté na moderashón y solamente lo sali publicá si e «bitacorístanan» ta haña qu ta trata di un reacshón constructivo (no necesariamente mester tá di acuerdo cu nós).