Declarashón Final: Parasitismo Macamba (2)

Ofensiva Final

Den nos promé edishón nós a relatá algún asuntu di principio qu ta determiná e actual proceso di colonisashón. Un punto di considerashón:

Nós no méster considerá e proceso di colonisashón como un proceso clásico di ocupashón, explotashón, dominio etc. etc. E proceso actual tá muchu mas dinámico, flexíbel, adaptábel y especialmente sútil según e condishonan di momento. Ocupashón, colonisashón, explotashón, opreshón tá procésonan vigente ya cuátershen aña. Además ocupashón y colonisashón y tur su consecuéncianan pernicioso awor mas qu nunca ta requerí di colaborashón. ¿Colaborashón di quen? Colaborashón di un sector di sociedad precisamente corrumpí pa colonialismo rassista macamba di cuátershen aña. Corumpí na tal nivel qu ta bisa qu «Hulanda ta stima nós» y «nós mes no por». Nós no quièr men solamente corumpí pa cèn y posishón privilegiá, sino mas aínda pa e eféctonan y consecuéncianan sicopatológico como resultado di cuátershen aña di ocupashón, explotashón, dominashón, sclabitud y genocidio qu a resultá den hende a través di nos espectro social, di grandi te chiquí, di bieu te hoben, di ricu te póber, di descendiente di catibu te descendiente di doño di catibu qu no ta quere qu nós por bira independiente pasobra nós mes no por. Hende miedoso.

E resultado tá un sociedad qu aínda tá feudal den tur sentido di palabra, caminda macamba tin tur privilegio y algún di nós den nan rabu pa sinti e sabor di algu di privilegio. Un élite qu no tin ningún clase di ambishón qu no tá mas qu mantenshón di e actual Status Quo colonial feudal di cua e ta cosechá algu, sin realisé qu sin e structura feudal colonial parasitario ey, l’e por a cosechá mas tantu. Y un pueblo, e hòmber «común y coriente» qu no ta realis’é qu e tá nada mas qu «recurso humano», manera e tábata antes caba.

Prostitushón di idioma a baha na e nivel qu a reducí, manera tempu di catibu, hende na nivel di calque otro recurso necesario den e cadena di producshón.

Nós como colonia tá recurso natural y humano pa sirbi interés macamba. Di tal manera nós tá recurso humano qu nós tá contentu qu nos yunan por bai studia na Paisnan Abóu sin realisá nós qu nán tá recurso humano pa interés y desarollo macamba. Mayoría ta queda Paisnan Abóu y ta yuda desarollá Paisnan Abóu. Resultado: un subdesarollo permanente, un anemia permanente pasobra e mihonan entre nán no ta bolbe pa construí un patria mihó.

E «interacshón» colonial feudal aquí tá totalmente parasitario. Colonialismo macamba tá parasitario. Colonialismo macamba ta extraé e mihó eleméntonan di nós, for di recurso natural te recurso humano pa su mes beneficio y no esún di nós. Den término científico nós por llamé un simbiosis parasitario patológico: e parásito, macamba, sémper ta sali beneficioso. E huesped, nós, sémper ta sali pèrdí. Shell tábata pasahero y offshore macamba a desbaratá y lanta na Paisnan Abóu.

E sistema colonial macamba parasitario ta mantené su huésped, nós (Antilla), den un condishón stacionario suficientemente condishoná pa por sigui parasitá, sigui chupa. P’esey no tin adelanto real, progreso real y bienestar real. Tur intento di nos banda e parásito macamba ta probechá mesora tantu pa loque ta trata recurso humano como recurso natural.

E proceso parasitario macamba aquí tá e mecanismo qu ta guía e actual proceso. Y manera tur parásito, e ta adaptá según circunstancia. P’esey e sistema parasitario macamba tá dinámico, flexíbel y adaptábel según e momento.

Na áñanan 40-50 di siglo pasá e sistema parasitario macamba corupto aquí a producí Statüt pa por sconde su naturalesa colonial parasitario. Esey quièr men qu no tábata menos parasitario. Al contrario.

Si nós comprondé su naturalesa, anto nós ta comprondé qu loque pa asina tantu hende tá autonomía, tá un sistema sirbiendo parasitismo colonial rassista macamba. Sémper. Ehemplo tin suficiente: Mira con nós sociedad ta sirbi como «playground» y desarollo pa «stagiaire» macamba, excluyendo nos mes múchanan permanentemente. E preferencia macamba pa macamba tá fundamentalmente rassista, basá riba nan código genético rassista di apartheid.

Pa nós por sirbi nan interesnan a crea e ilushón di autonomía. Pero e fundamento di loque pa mayoría di nós tá autonomía, tá colonial rassista: nos leynan bou di e pretexto di concordancia tá trahá según nan concéptonan, modelá bou di guía di nan specialístanan hurídico (como asistente técnico). Nós sistema hudicial tá totalmente controlá pa macamba. Nós fiscalía tá controlá pa macamba. E figura hurídico gobernador, awendía dòrná pa un yu di tera, tá controlá pa macamba. Y pa tur siguridad qu e yu di tera aquí, como representante macamba aqui, no ta bai contra interés macamba, a pone banda di je como còntròl un representante di reino (lesa macamba). Statüt tá un documento colonial corupto, resultado di e acto coruptivo di mas bárbaro qu historia humano conocé: colonialismo parasitario rassista macamba.

Prostitushón di idioma tá di tal naturalesa qu e parasitismo aquí macamba ta llama yudansa.

Mañán nós ta (purba) sigui.

Papiamentu Bibu


P.d.: Artículo 3 di e Concepto Areglo di Departamento Colonial Còrçáo ta siña nós qu por nombra hulandés (den sentido hurídico) na calque posishón público.