UN GÒLPI DI ESTADO PA PURBA SPANTA BALENTE

Den e siguiente documento, sr. Ivar Asjes den su calidad di presidene di parlamento, ta reacshoná riba e rapòrt di Comishón Rosenmöller:

Komunikado enkuanto Rapòrt Rosenmöller...

"UN GÒLPI DI ESTADO PA PURBA SPANTA BALENTE"

by Ivar Asjes

Di forma enérgiko Presidente di Parlamento di Kòrsou, Sr. Ivar Asjes, a reakshoná riba e Rosenmöller, denunsiando esaki komo un obvio intento di ‘Politiek Den Haag’ pa kometé un gòlpi di estado estatal i polítiko dor di provoká un intervenshon di parti di Gobièrnu di Reino den asuntunan netamente interno di Kòrsou p’asina trata na tumba Gobièrnu di Kòrsou.

Segun Sr. Asjes, na promé bista kaba e rapòrt ta negligente, partidario i klaramente esnan ku a skibi e rapòrt no a demostrá profeshonalismo. “Speshalmente kaminda e rapòrt ta pretendé ku e akusashonnan ku a sali den publisidat kontra di e Presidente-direktor di Banko Sentral i algun gerente di Aqualectra supuestamente no ta basá riba echo ta hopi remarkabel, siendo ku Kontrolaría General ku ta e órgano ku Parlamento di Kòrsou a enkargá pa hasi un investigashon profundo te ainda no a kompletá su trabou al respekto. Ta insólito i un falta di rèspèt total pa nos estado di derechi demokrátiko ku Rosenmöller i konsorsio ta trata na influenshá i adelantá riba e resultado di e investigashon di Kontrolaría General di Kòrsou”.

Sr. Asjes ta di opinion ku e rekomendashon di Komishon Rosenmöller pa Parlamento pidi Gobernadó di Kòrsou pa apuntá un Komishon di Sabionan pa bolbe investigá e akusashonnan di e Presidente-direktor di Banko Sentral kontra di Minister-Presidènt Schotte i e Ministernan Jamaloodin i El Hakim ta un falta di rèspèt flagrante pa nos estado di derechi demokrátiko i nos Ministerio Públiko en partikular. “Ta Ministerio Públiko ku pa kolmo ta funshoná den kuadro di un Lei di (Konsenso di) Reino ta e úniko instansia yamá pa hasi tipo di investigashonnan asina. Ku e rekomendashon aki, Rosenmöller i konsorsio ta sembra duda riba e trabou i/òf investigashon ku Ministerio Públiko a hasi pa lokual ta trata Minister-Presidènt Schotte i ta hasiendo ainda pa lokual ta trata e Ministernan Jamaloodin i El Hakim. Mas aleu, e echo ku Komishon Rosenmöller ta dediká gran parti di su rapòrt na ‘skrinen’ di algun minister, siendo ku e asuntu aki ya no ta alkaso, ta sumamente kuestionabel i kondenabel”. Segun Sr. Asjes, Rosenmöller i konsorsio ta sembra duda den Gobernadó di Kòrsou i nan propio Minister Dönner, pasó ta Rosenmöller i konsorsio mes ta establesé den nan rapòrt ku Gobernadó di Kòrsou i Minister Dönner a indiká bon klá den nan kartanan di respektivamente 12 di yanüari 2011 i tambe 19 di yanüari i 8 di febrüari 2011 ku no tin sufisiente base pa konkluí ku Minister-Presidènt Schotte i e Ministernan Jamaloodin i El Hakim lo no ta ministeriabel. “Esta, Rosenmöller i konsorsio di un banda mes ta bisa bon klá ku Gobernadó di Kòrsou i Minister Dönner a deklará i konkluí por eskrito ku Schotte, Jamaloodin i El Hakim por sigi ehersé nan funshon ministerial. Mientras di otro banda den e mesun rapòrt aki Rosenmöller i konsorsio, sostené pa ‘Politiek Den Haag’ i nan aliadonan lokal ku ta forma e ‘grupo 40’, ke trata na fòrsa e 21 miembronan di Parlamento ku nos Pueblo a skohe den elekshon liber i sekreto pa tuma un desishon kolonial, esta di pidi Gobernadó di Kòrsou pa apuntá un Komishon di Sabionan pa bolbe investigá algu ku e mesun Gobernadó aki ya kaba a bisa ku no ta nesesario. Rosenmöller i konsorsio asta ta bai asina leu di menasá ku, al final, Gobièrnu di Reino lo mester pone henter Parlamento di Kòrsou un banda i kometé un gòlpi di estado estatal i polítiko ku e meta pa tumba Gobièrnu di Kòrsou. Ta p’esei, mester konsiderá e rapòrt Rosenmöller komo un atentado kontra nos Demokrasia i Independensia Parlamentario. Rosenmöller i konsorsio, sostené pa ‘Politiek Den Haag’ i nan aliadonan lokal ku ta forma e ‘grupo 40’, ke purba spanta balente dor di menasá ku un gòlpi di estado, pero nan lo no logra”. Pa basta tempu kaba e mayoría di nos Pueblo no tin miedu di ‘Politiek Den Haag’. Nos Pueblo a mira kiko a sosodé na Boneiru i lo no pèrmití pa ‘Politiek Den Haag’ bin hasi i deshasí na Kòrsou, asina Sr. Asjes a duna di konosé.

Ta for di 14 di yüni último Presidente di Parlamento Asjes a bisa Parlamentarionan Ulandes di forma klá i raspá durante e enkuentro interparlamentario na Ulanda ku ‘Politiek Den Haag’ mester siña respetá Parlamento komo e organo demokrátiko mas haltu di Kòrsou. Sr. Asjes a bisa ‘Politiek Den Haag’ bon klá ku e kontroversia ku a surgi entre Presidente-direktor di Banko Sentral i Minister-Presidènt Schotte, Minister Jamaloodin i Minister El Hakim ta un asuntu interno i ku nos mes ta atendé nos asuntunan; den e kaso aki dor di laga Kontrolaría General di Kòrsou investigá esun banda i warda e resultado di e investigashon di Ministerio Públiko pa loke ta trata e otro banda. Sr. Asjes a bisa ‘Politiek Den Haag’ bon klá ku Gobièrnu di Reino no por drenta i intervení, aplikando artíkulo 43 insiso 2 di Statùt, pasó nos aki na Kòrsou mes a atendiendo e situashon. Te ainda esaki ta e kaso, pues Gobièrnu di Reino por usa e rapòrt di Komishon Rosenmöller pa trata na spanta balente, pero nan sa bon bon ku nan no por drenta, asina Sr. Asjes a indiká.

Segun Sr. Asjes, mihó Rosenmöller i ‘Politiek Den Haag’ atendé nan asuntunan na Ulanda, esta: “Begin bij jezelf”. “Mihó Rosenmöller bai bisa Parlamento Ulandes pa pidi La Reina pa apuntá un Komishon di Sabionan p’asina kumisá investigá e numeroso kasonan bochornoso, manera por ehèmpel esun di Minister Hans Hillen ku supuestamente a ‘lubidá’ di deklará fondonan ku ela risibí di e industria di tabako. Na lugá di kore ku Minister Hillen, ‘Politiek Den Haag’ a pèrmití Hillen pa keda minister despues ku Hillen mes a atmití ku ela risibí plaka di e lòbi di tabako p’asina influenshá politikonan Ulandes, tempu e tabata Senador den Parlamento Ulandes. Tambe tur hende ta kòrda e kaso di e alkalde Gerd Leers, ku a regalá un ambulans di e Munisipio Maastricht relashoná ku un kas di vakashon privá ku ela kumpra na Bulgaria i tambe e 100.000 euro pa aña ku ela regla p’e mes te dia e baha ku penshun. Awe e mesun Gerd Leers aki ta minister den gabinete Rutte. Ademas, ta bon pa Pueblo di Kòrsou kòrda ku e Minister-Presidènt di Reino, esta Mark Rutte, ta un hende ku tin un karchi di kastigu, pasó Korte di Hustisia Ulandes a kondené den su funshon komo Sekretario di Estado di Asuntunan Sosial pa diskriminashon di hendenan di desendensia Somalí na aña 2003.

Anto, resientemente Rosenmöller i ‘Politiek Den Haag’ a keda ketu ketu i a pèrmití pa den nan País, den e kaso aki na Boneiru, Sr. Burney El Hage huramentá komo Diputado i bira gobernante di e Isla Ulandes aki, siendo ku e ta un sospechoso den e kasonan penal di ‘Fiji’ i ‘Zambezi’ enkuanto di korupshon, labamentu di plaka i froude di magnitut internashonal. Mihó Parlamento Ulandes pidi La Reina pa apuntá un Komishon di Sabionan pa kumisá investigá kon esaki por ta posibel.

Pa lokual ta trata Banko Sentral Ulandes (DNB) dia 16 di sèptèmber último tur hende ku a lesa e korant Ulandes ‘NRC’ por a tuma nota kon den un artíkulo un di e èks-direktornan di DNB, Sr. Lex Hoogduin, a tilda e Minister di Finansa Ulandes di a nombra un amigu polítiko, esta Sr. Klaas Knot, komo Presidente-direktor di DNB. E artíkulo ta indiká klaramente ku e intervenshon polítiko aki di parti di Gobièrnu Ulandes a hasi daño na e posishon independiente di DNB”. Pues, segun Presidente di Parlamento Asjes, mientras Rosenmöller i ‘Politiek Den Haag’ ke mustra dede den direkshon di Kòrsou irónikamente un biaha mas ta sali na klá ku nan no tin e outoridat moral pa hasi esei.

Finalmente Presidente di Parlamento Asjes ta reiterá ku Pueblo di Kòrsou por ta sigur ku e mayoría di su representantenan lo no laga Pueblo na kaya ora di defendé nos País kontra di e gòlpi di estado estatal i polítiko ku ‘Politiek Den Haag’ ke purba spanta balente ku’né. “Rosenmöller, ‘Politiek Den Haag’ i nan aliadonan lokal ku ta forma e ‘grupo 40’ mester siña respetá demokrásia di nos País. Parlamento di Kòrsou mester warda e resultado di e investigashon di Kontrolaría General pa lokual ta trata e Presidente-direktor di Banko Sentral i e resultado di e investigashon di Ministerio Públiko pa lokual ta trata e akusashonnan kontra di e Ministernan Jamaloodin i El Hakim. Anto, mientras ku nos mes ta atendiendo nos asuntunan internamente, Gobièrnu di Reino no por imponé nèt nèt nada!”. E bitácora aquí tá abrí pa reacshón. Tur reacshón tá someté na moderashón y solamente lo sali publicá si e «bitacorístanan» ta haña qu ta trata di un reacshón constructivo (no necesariamente mester tá di acuerdo cu nós).

Ivar Asjes,
 Presidente di Parlamento di Kòrsou