Oh, bisami, anochi amiga, amada bieu…

¡Oh, bisami, anochi amiga, amada bieu,
qu ta trecemi e retablo[1] di mi sóñonan
sémper so y desolá, y so
cu mi fantasma adén,
mi póber sombra tristu
den cunucu y bou di solo di candela,
o soñando amargura
den bosnan di tur misterio,
bisami, si bó sa, amada bieu, bisami
si tá di mi e lágrimanan qu mí ta basha!
Anochi a rospondemi:
Hamás b’a revelami bo secreto.
Nunca m’a haña sa, amado,
si tábata abo e fantasma ey di bo soño,
ni m’a averiguá si su bos tábata di bo,
o tábata e bos di un fantocha grotesco.
M’a bisa anochi: Amada mentiroso,
abo sa mi secreto;
abo a mira e cueba hundu
caminda mi soño ta fabricá su cristal,
y bó sa qu mi lágrimanan ta di mi,
y bó sa mi doló, mi doló bieu.
¡Oh! Mí n’ sa, anochi di, amado,
mí n’ sa bo secreto,
aunque m’a mira cana bai-bin esún qu bo ta llama
fantasma desolá, den bo soño.
Mí ta aparecé na álmanan ora nán ta llora
y scucha su profundo rezo,
humilde y solitario,
esún qu bo ta llama salmo berdadero;
ma den e profundo bóvedanan di alma
mi n’ sa si lloramentu tá un bos o un eco.
Pa scucha e quehamentu di bo lepnan
m’a buscabu den bo soño,
y ey m’a mirabu ta cana bai-bin
den un laberinto trubel di spil.

Antonio Machado

(For di: Soledades (1899-1907) – Poema XXXVII)


© 2007 Papiamentu Bibu

---

[1] retablo

sustantivo
1 ARTE Construcshón di palu, piedra o otro materia qu ta cubri y dòrna e muralla caminda tin un altá.
2 ARTE Serie di pintura o de figura tallá qu ta representá un historia o un suceso.
3 TEATRO Representashón teatral di un episodio di historia sagrado.