Weg Vrij Voor Nederland (Peppie Sulvaran)

Nós ta publicá integralmente un artículo di abogado Sulvaran relashoná cu e consecuéncianan di Declarashón Final. Den pasado diferente be nós a llega di atendé riba e consecuéncianan aquí. Lesa por ehemplo e Caso van der Sloot den Contexto y E Día Después.

Abogado Sulvaran na palabra:

MINISTER DI Hustisia di Kòrsou i St. Maarten nobo, a haña ku firmamentu di e akuerdo di 1 di òktober 2008, responsabilidat final pa solamente órden públiko i seguridat. Nan tin mag di kontrolá kosnan manera Karnaval òf por ehèmpel manifestashonnan kontra Hulanda. Investigashon i persekushon ta keda bou di kontròl final Hulandes. Esei ta fásil pa splika. Segun e akuerdo i komunikado di prensa di 1 di òktober 2008, poder di investigashon i persekushon ta bou di responsabilidat di Prokurador General. Den e akuerdonan ku nos gobernantenan a firma ku Hulanda, ta poné bon kla ku tantu e minister Hulandes, komo e minister di Reino, ku ta nada mas ku e mes un minister Hulandes den otro kalidat, por duna instrukshon direkto, tantu den kasonan individual (bijzondere aanwijzing) komo den kaso di maneho (algemene aanwijzing) na Prokurador General, riba e tereno di investigashon i pèrsekushon.

Den sierto kaso esei por te hasta na telefòn, si e minister Hulandes den un òf tur dos di su kalidatnan ta haña ku esei ta nesesario. E minister Ulandes tin e palabra final, sigur si e ta haña ku esaki ta urgente. Den e kaso ei nos minister no ta ‘kom eraan te pas’ manera Hulandes ta bisa. Al kontrario, e akuerdo ta un konfirmashon ku nos lo entregá e podernan aki na Ulanda, pasobra manera nos a splika kaba, e minister Ulandes por manda nos bai flit, si nos pidié pa duna kuenta i rason di e órdennan ku e duna na nos Prokurador General. Den mes un estilo arogante ku Minister Hulandes, Ella Vogelaar, a hasi ku nos Premier, ora el a bai reklama ku e no ta di akuerdo ku Verwijs Index (VIA) pa Antianonan i a haña nùl riba su petishon. Ainda nan ta papia den e akuerdo di 1 di òktober 2008, di pidi Raad van State konseho pa lokual ta trata e responsabilidat sivil di e minister Hulandes den su kalidat di minister di Reino pa e instrukshonnan ku e duna na nos Prokurador General. Esei ke men ku nan mes ta sali te ainda for di e punto di bista, ku e aanwijzingsbevoegdheid lo bini en bes di bisa for di awó ku pueblo no ke e aanwijzingsbevoegdheid i ku esei ta un punto di prinsipio. Manera Aruba a hasi. Por sierto un instansha ku sede na Hulanda, ku ya a akordá pa hinka Antianonan den hòki deskriminatorio di VIA na Hulanda. Ta den nan man esnan ku ta skohé pa sirbi nos interesnan ke hinka destino di nos outonomia i nos demokrasia. I ku e kos ey lo bai trese mas hopi problema, mas desunion, divishon i violensha den nos mes pueblo, ta mas kla ku di dia. Ku rasón, pasobra demokrasia di un pueblo no por ta na benta nunka.

Den e konsepto di voorstel Gemeenschappelijke voorziening ta pará, ku si tin diferensha di opinion entre e korpschef i e hefe di e Gemeenschappelijke voorziening, nan mester bai promé Prokurador General, kende manera nos a mira, su chèf mas haltu lo ta e minister Hulandes den tur su dos kalidatnan i despues e por bai serka nos mes minister. E problema ta ku e Prokurador General ta obligá na sigui e instrukshon Hulandes, ku e ke òf nò, sigur den kasonan di urgensha i e minister lokal lo no por evitá esei, si e minister Hulandes disidí ku e P.G. tin di sigui su òrdu mesora. Polisnan pues no a logra apsolutamente nada, al kontrario. No ta bin Korps riba Korps, pero ta bin Minister Hulandes riba Korps, sigur den kasonan di investigashon i persekushon. Te hasta ora tin diskushon riba personal ku mester wòrdu usá, e minister Hulandes pa medio di PG por intervení promé ku nos mes minister por bisa òf hasi algu. Asina pa falta di konosementu i kurashi, e hulandesnan no solamente a logra mina e responsabilidat polítiko di nos minister di hustisia, pero tambe a logra pa tin kontròl kompletu riba e makinaria di investigashon i persekushon ora nan haña ta bon, pa medio di instrukshon direkto na nos P.G., kual instituto, nan a hasi un Hudas den e sistema hudisial nobo, ku te hasta lo tin mas poder ku e propio minister di hustisia, pa motibu di su laso direkto for di Hulanda, ku ni nos mes minister ni nos pueblo, esta nos Parlamento, lo no tin ningun klase di kontròl riba dje. Hopi kurashi i kai kai pa saka portrèt i saka djente pa e kos aki. Pa usa un término hulandes, e ‘schaamrood’ mester subi na nan kachete.

Lokual a wòrdu firmá dia 1 di òktober 2008, no ta nada mas ku un fortifikashon i konfirmashon di e posishon intokabel di e minister di Hustisia Ulandes den e paisnanan nobo, Kòrsou i St. Maarten. Mientras e ‘aanwijzingsbevoegdheid’ di e minister hulandes ta riba mesa, no ta importá loke kumbiní, pasobra Hulanda ta keda ku tur ‘touwtjes in de handen’ i por pone tur pòpchi na Antia baila e ritmo di investigashon i persekushon ku nan ke i sin ku nos pueblo lo tin ningun klase di kontròl riba esei. E kos aki ta hopi tristu. Un bèrgwensa total. Hulanda a bolbe bende nan gato na saku. P’esei e kabes di e komunikado di prensa di 01.10.2008 ta robes. ‘Weg vrij voor Ronde Tafel Conferentie’ mester ta ‘Weg vrij voor Nederland’, ku ta bebe awa limpi den e kaso aki, mientras nos ta keda piska ku otro den awa trubel.

PEPPIE SULVARAN
Kòrsou