Macamba su trayectoria di colonisashón, ocupashón, sclabitud, terorismo – sí, tene hende contra su boluntad den un campo di concentrashón bou di condishonan infrahumano, tá terorismo – intimidashón, explotashón , saqueo tin un trayectoria di mas qu tres siglo. E proceso ey nunca a para.
Mas qu treshen aña di terorismo y intimidashón a crea un yu di tera dócil qu fácilmente ta reacshoná «a control remoto». Político macamba méster jis abri boca y menasá nós directamente o indirectamente y nós ta pará stret, cla pa sigui orden.
Den un análisis di Gelt Dekker su mente colonial racista – Perfil Sicológico di un Racista 2 – nós a referí na e proceso di terorismo y intimidashón aquí, característica di sistémanan totalitario manera nazismo. Por lo tanto nazismo no a nace den e mente di Hitler na áñanan trinta di siglo pasá, sino muchu mas promé na entre otro e cámponan di concentrashón na Quenepa y Santa Cruz.
E diseño colonial racista – sémper bai e mesun parásito simbiótico / inseparábel – contrali tur intenshón colonial macamba, a haña basta contratempu y sla. Pa cuminsá resistencia indonés qu a resultá den independencia indonés. Na di dos lugá no realmente resistencia antillano, sino un cambio revolucionario mundial, promové pa revolushón ruso y diferente coriente revolucionario «local», qu a obligá diferente poder colonial decolonisá.
Entremés
Decolonisashón y independencia no ta nificá qu a libra di e parásito colonial racista. Es decir, ora macamba a llora «Indïe verloren, rampspoed geboren», no tábata nada mas qu «lágrima di cocodrilo», pasobra e structúranan colonial di explotashón y saqueo no ta disparcé di un día pa otro. Sí independencia ta nificá qu en principio por cuminsá qu e berdadero proceso di decolonisashón.
Un ehemplo clásico di decolonisashón tá e proceso revolucionario cubano y recientemente venezolano / bolivariano / boliviano /ecuadoriano / paraguayo etc., etc. Tá procésonan qu legítimamente ta exigí qu por ehemplo tur materia prima tá di pais. País ta dicidí e condishonan qu ta explotá un materia prima estratégico manera petroli. Nós méster realisá nós qu un pais manera Venezuela tá independiente for di 1845; 163 aña. A tuma mas qu 150 aña pa Venezuela realmente cuminsá e proceso di decolonisashón y realmente dicidí su caminda soberanamente.
Pa nós, Antilla, na áñanan 40-50 di siglo pasá ta diseñá un documento colonial racista qu nós conocé como Statüt. E documento aquí no tábata nada otro qu un maniobra pa tapa e berdadero structura colonial racista. E documento aquí además lo no a sobrebibí si no tábata pa nos mes héndenan qu na Nashonan Uní a declará qu supuestamente nós tin autonomía.
Statüt no tábata nada otro qu un paso temporal di política colonial macamba di quièr controlá nos patria indefinidamente.
Cu tempu pocopoco a bin sali na cla qu Statüt su bida útil tábata limitá. Es decir qu e teritórionan colonial Sürnám y Antilla no por a queda controlá pa eternidad cu e documento colonial racista aquí. E promé gòlpi tábata independencia di Sürnám. E siguiente gòlpi a bini di parti di Aruba qu, aunque eróneamente a agitá contra Còrçáo pa logra su meta, a duna inicio na e proceso di balcanisashón di Antilla.
Un documento qu inicialmente tábata parce bentahoso pa Antilla, pocopoco qu tempu a cuminsá mustra su berdadero carácter colonial racista. Pues posibilidadnan real di desarollo no tábata posíbel. Desarollo por ehemplo vía integrashón y cooperashón regional cu Caribe y Latinoamérica, especialmente riba tereno financiero-económico, o sea haci nogoshi pa bisé den palabra símpel, no tá posíbel, sin «aprobashón» macamba. Pa tur esaqui nós ta na merced colonial macamba.
E documento aquí tambe pa e poder colonial a cuminsá resultá trabahoso y difícil di mantené, pues tambe pa nán e documento tábatin un bida útil temporal.
Acuerdo Final. E ta zona «pa sémper». Acuerdo Final no tá nada otro qu e siguiente paso pa bolbe adaptá Statut conforme e necesidadnan colonial racista di Paisnan Abou. Loque realmente tá pasando tá qu ta reversando, o ta trata di reversá tur clase di desarollo emancipatorio y bolbe hinca nán den un bachi colonial racista sin ningún clase di escrúpulo, sin sconde.
E pregunta qu nós a haci nós mes e díanan aquí tá, si macamba tá consciente di e «frútanan» qu nan consolidashón y profundisashón di colonisashón lo duna den futuro.
Laga nós haci e siguiente pregunta: ¿Na quico nós ta debiendo e «cooperashón» macamba pa caba di desbaratá Antilla, siendo qu sémper nán tábata contra?
Nós a llega di scirbi caba qu e proceso di balcanisashón di Antilla, un proceso qu tin como base crea desunión entre nós, a haña un carácter propio cu anecshón di Boneiru, Saba y St. Eustatius. Pues, a anexá teritorio antillano caminda política di Nashonan Uní ta papia di promové decolonisashón y independencia. Macamba su sed colonial racista tá totalmente contrali na loque Nashonan Uní a formulá tantu década pasá.
Na di dos lugá nós ta papia di fortificashón di structúranan colonial na Còrçáo y San Martin ora ta trata di haña mas gara riba husticia, procurador general (sea vía un macamba o un marioneta local), finanza, educashón etc., etc.. Realmente antó riba tur tereno, pasobra esún qu ta controlá finanza, ta controlá sobrá. Y vía e Comishón di Supervishón Financiero, macamba tá controlá nos finanza público.
E proceso aquí tá adelantando riba algún proceso regional y internashonal.
E pregunta qu a haci anteriormente ta queda para un ratu. Tá necesario sigui desarollá otro tema pa después nós convergí tur desarrollo den e pregunta qu nós a haci.
Diferente be nós a llega di referí na e proceso di balcanisashón di Antilla. Pa por controlá un teritorio mihó, como colonisadó, méster promové desunión. E promé paso tábata Aruba. E siguiente paso tá e consecuéncianan di Acuerdo Final. Pero den e caso aquí no solamente ta balcanizando Antilla, sino ta gibraltarisando Antilla, es decir ta anexando parti di e teritorio (Islanan BES) pa tempu indefiní.
¿Paquico? Nós ta bini awor riba e dos procésonan internashonal qu tá di interés pa nos posishón.
1. E crisis financiero mericano como factor principal di desintegrashón di imperio
2. Integrashón latinoamericano / caribe promové pa cámbionan revolucionario (Mercosur / Alba / Petrocaribe / Banco del Sur / Unasur etc. etc.)
E crisis financiero mericano tá di importancia histórico trascendental pasobra e tá nificá acelerashón di desintegrashón di imperio germano (Merca-Inglatera-Paisnan Abou). Tá di gran importancia realisá nós qu imperio germano no a muri mañán.[1] Al contrario, lo tá un proceso lento. E proceso aquí lo conocé un morto mas acelerá aínda mientras mas tantu y mas lihé Latinoamérica y Caribe integrá y bira menos dependiente. E proceso di desintegrashón di imperio germano lo facilitá nos emancipashón y independencia. No ta un desintegrashón sin pelíguer.[2]
Nós méster tá consciente qu posishón macamba tá dirigí pa interés propio. Si día di mañán nan asociashón na imperio germano no ta cumbiní nán mas, nán lo busca otro aliansa. Aqui no tin ningún clase di lealtad. Simplemente interés propio.
Integrashón latinoamericano / caribe y e cámbionan qu tá tumando lugá especialmente na Latinoamérica algún día lo llega nos costa. E cámbionan revolucionario na Latinoamérica tambe lo faborecé nos emancipashón y independencia.
Nós ta bolbe na e pregunta pa finalisá e artículo aquí.
¿Na quico nós ta debiendo «cooperashón» macamba pa caba di desbaratá Antilla, siendo qu sémper nán tábata contra?
E proceso actual tin un solo fin: mantené y consolidá e proceso di colonisashón pa por sigui haci loque nán ta haciendo ya pa mas qu treshen aña: explotashón y saqueo. Declarashón Final tá un paso mas di un proceso qu ya tá durando mas qu 350 aña.
¿Cu e proceso aquí macamba tábatin e vishón di mira e cámbionan y consecuéncianan di desintegrashón di imperio y cámbionan revolucionario y asina acelerá balcanisashón y gibraltarisashón di Antilla? E posibilidad ta existí. Nós mes no ta quere qu tá asina.
Sí tá asina qu Declarashón Final y su consecuéncianan lo por wanta influencia pa cu nós di e dos procésonan qu nós a desarollá y lo por complicá y/o tarda nos emancipashón y finalmente nos independencia.
Papiamentu Bibu
Pa sigui lesa:
América Latina ¿Reserva de EU?
Chávez relanza idea para creación de banco petrolero internacional
El “nuevo pensamiento” de Robert Zoellick, el hombre del ALCA y de los TLCs
Suramérica debe ser factor de poder mundial, afirma Chávez
El Banco del Sur: Avances y desafíos
Noam Chomsky: integración latinoamericana “mina el control de Washington” en la región
Brasil y Venezuela fortifican relaciones económicas bilaterales
Insiste Chávez en necesidad de Banco del Sur
América Latina: Revolución de amplia base y metas compartidas
Chávez: "Gobierno de Venezuela está en Caracas y no en Washington"
USAID, arma clave de la guerra sucia contra América Latina
The Destabilization of Bolivia and the "Kosovo Option"
Chavez Embarrasses Us As Arabs
Evolution of the Apocalypse: Empire’s Demise, Human Renaissance
The New American Century; Cut short by 92 years
No hay comentarios:
Publicar un comentario