Mardugá

Mí no sa quen a busca contacto. Mí no ta còrda si Hemayel a solicitá amistad o ami mes a solicitá amistad a través di FB. No tábatin intercambio di idea. Ningún clase di comunicashón.

Hemayel su morto a impreshonami y afectami sobremanera. For di e momento qu noticia a sali, m’a queda cu un intranquilidad, un desasosiegu. Mashé bes mes mi sintí tábata cai riba Hemayel.

E Pregunta a causa nóchinan di insomnio. Diamars anochi a cuminsá, sin qu m’a realisami esey, e promé contracshonan di un parto. Aritmia. Profundo den mardugá, tábata den careda di mitar di cuáter, a resultá un poema, mal còrtá di palabra shimarón. Difícil di capturá. No tábatin moda. Poesía tá evolushón. E final tábata un catarsis. Aceptashón a sigui. Anochi tábata cómplice den mi solitud. E siguiente poema tá inspirashón/contesta riba e pregunta.

Mardugá

Un tributo na Hemayel

Den soledad di mardugá.

Na bo patria

anochi a rancabu bai cu ne,

entre metal na filingrana

y asfalt friu.

Den scuridad di mardugá

un biaha mas

b’a duna acto di bo

Presencia.

Den bó a culminá

e speransa di pasado.

Den bó, un biaha mas,

nos Ancéstronan

A cera Moqueta.

Bó tábata Concentrá.

Esencia.

Largu pas na bo huésunan,

Ancestro Hemayel.

Bisa nán pa mí, Hemayel,

bisa tur pa mí,

bisa nán un pa un pa mí:

Bó Morto a planta Similla.

Papiamentu Bibu

E bitácora aquí tá abrí pa reacshón. Tur reacshón tá someté na moderashón y solamente lo sali publicá si e «bitacorístanan» ta haña qu ta trata di un reacshón constructivo (no necesariamente mester tá di acuerdo cu nós).